Pagat e mësimdhënësve në Kosovë sipas Ministres së Arsimit, Arbërie Nagavci, janë të përafërta me ato të shteteve të rajonit, me ç’rast më të mëdha se në Maqedoninë e Veriut, e pak më të vogla se në Shqipëri.
Sipas të dhënave të Ministrisë së Arsimit, Shkencës dhe Teknologjisë, paga bazë për mësuesit që japin mësim në shkolla fillore është 421.20 euro, ndërsa në shkollë të mesme kjo pagë është 459.95 euro.
“Paga bazë e një mësuesi të shkollës fillore është 421.20 euro, ndërsa paga e një arsimtari në shkollë të mesme është 459.95 euro. Për mësuesit parafillor kjo pagë është 393.22 euro”, thuhet në përgjigjet e dërguara nga Ministria e Arsimit.
Po çfarë jetese mund të bëjnë mësimdhënësit me 421 euro në muaj? Sigurisht jo çfarë e meritojnë, dhe ngritja e çmimeve ua ‘zvogëlon’ këtë pagë krahasim me vitet e kaluara.
