Ministrja e Arsimit, Arbërie Nagavci, ka nënshkruar vendimin për themelimin e Kolegjiumit të institucioneve parashkollore në Kosovë, shkruan AlbanianEducation.net.
Ajo thotë se kolegjiumi do të përbëhet nga drejtorët dhe drejtoreshat e të gjitha formave të organizimit të institucioneve parashkollore.
Postimi i ministres:
Kam nënshkruar vendimin për themelimin e Kolegjiumit të institucioneve parashkollore në Kosovë.
Edukimi në fëmijërinë e hershme është ndër prioritetet kryesore të qeverisë sonë, andaj bashkë me kolegjiumin do të promovojmë cilësinë, barazinë dhe iniciativat për të mbështetur institucionet parashkollore në arritjen e standardeve optimale të edukimit në fëmijërinë e hershme.
Kolegjiumi do të përbëhet nga drejtorët dhe drejtoreshat e të gjitha formave të organizimit të institucioneve parashkollore.
Ndër të tjera ky kolegjium:
Bashkëpunon ndërmjet institucioneve parashkollore në vend;
Promovon dhe mbron të drejtat e fëmijëve brenda institucioneve parashkollore;
Kontribuon në përmirësimin e cilësisë së punës së institucioneve parashkollore;
Përforcon kapacitetet dhe përvojat profesionale të personelit të institucioneve parashkollore.
Promovon programe, qasje dhe shërbime inovative në zhvillimin e edukimit në fëmijërinë e hershme.
Suksese kolegjiumit dhe të gjithë atyre që punojnë me dhe për fëmijët tanë!
