Ministrja e Arsimit, Arbërie Nagavci, ka njoftuar se këtë vit për herë të parë, shkollat do të marrin individualisht rezultatet e testit të kaluar PISA, për të identifikuar dhe adresuar sfidat, shkruan AlbanianEducation.net.
Ajo ka ftuar të gjitha institucionet arsimore të angazhohen për një përmirësim real, pasi thotë se çdo përmirësim në arsim është një investim në të ardhmen.
Postimi i saj i plotë:
Arsimi nuk është vetëm mësim, por çelësi për të ardhmen. Sot, më shumë se kurrë, duhet të veprojmë për një arsim më cilësor.
Mbajtëm sot konferencën “Ndikimi i PISA-s në informimin e politikave arsimore në Kosovë”, një moment kyç për reflektim dhe veprim para Testit “PISA 2025”.
Si Ministri e Arsimit në këto katër vite kemi ndërmarrë hapa konkretë:
✅ 32% rritje të buxhetit të arsimit (2020-2025);
✅ 111 milionë euro investime në infrastrukturë (çerdhe, shkolla, biblioteka, laboratorë);
✅ Rishikim të teksteve bazë për Gjuhën Shqipe dhe Matematikën;
✅ Rregullore të re për përzgjedhjen e punonjësve arsimorë.
Bazuar në rekomandimet e ekspertëve, po punojmë për:
📌 Rikonceptimin e vlerësimeve shtetërore sipas metodologjisë PISA;
📌 Riorganizimin e shkollave dhe përgatitjen e administratorëve të testit;
📌 Forcimin e mekanizmave të monitorimit dhe informimit.
✅Këtë vit për herë të parë, shkollat do të marrin individualisht rezultatet e testit të kaluar, për të identifikuar dhe adresuar sfidat. Ftoj të gjitha institucionet arsimore të angazhohen për një përmirësim real sepse çdo përmirësim në arsim është një investim në të ardhmen tonë.
Suksesi në PISA është sukses i përbashkët!
