Ministrja e Arsimit, Arbërie Nagavci, ka marrë pjesë në punimet e Seminarit të 41-të për gjuhën, letërsinë dhe kulturën shqiptare.
Nagavci thotë se është gjithmonë kënaqësi të dëgjosh albanologë të huaj që prezantojnë kumtesat e tyre në gjuhën shqipe.
Tutje Nagavci thotë se si Ministri e Arsimit mbesim të përkushtuar për ofrimin e mbështetjes së pakursyer për Universitetin e Prishtinës në organizimin e ngjarjeve të tilla.
Postimi i saj:
Filloi punimet Seminari i 41-të për gjuhën, letërsinë dhe kulturën shqiptare. Kjo ngjarje e rëndësishme është rritur e zgjeruar, duke u bërë një platformë e qëndrueshme për evidentimin dhe promovimin e vlerave tona gjuhësore, letrare e kulturore.
Sot, Seminari po hyn në dekadën e pestë të jetës, dhe kjo është arritje e jashtëzakonshme. Shpreh vlerësim të veçantë për ata/ato që kanë mundësuar vazhdimësinë e kësaj ngjarjeje, posaçërisht në mesin e viteve ’90 e tutje, kur represioni ishte më i egër se kurrë.
Në këtë Seminar bashkohen studiues nga të gjitha trevat shqiptare –dhe ato të banuara me shqiptarë – nga fushat e gjuhësisë, letërsisë, antropologjisë, etnologjisë si dhe akademikë e studiues nga vende të ndryshme të botës, të cilët sjellin hulumtime dhe analiza me rëndësi të veçantë –duke e trajtuar shqipen nga këndvështrimi i një personi jo-shqipfolës.
Është gjithmonë kënaqësi të dëgjosh albanologë të huaj që prezantojnë kumtesat e tyre në gjuhën shqipe. Kjo na jep shpresë se gjuha jonë, sado e vogël, vazhdon të jetë me interes për studiues e gjuhëtarë anembanë globit.
Si Ministri e Arsimit mbesim të përkushtuar për ofrimin e mbështetjes së pakursyer për Universitetin e Prishtinës në organizimin e ngjarjeve të tilla.
