Rubina Muzina, mjeke në Shtetet e Bashkuara të Amerikës, në një lidhje direkte me studion e “Debat” nga Alba Alishani, në A2 CNN, foli mbi çështjen e vaksinimit të fëmijëve ndaj Covid-19.
“Në SHBA janë mbi 2 milionë fëmijë që e kanë marrë vaksinën. 30% e prindërve kanë treguar gatishmëri për vaksinimin e fëmijëve të tyre. Tani që kemi të dhëna, dimë që të pavaksinuarit janë 10 herë më të rrezikuar për të kaluar formë të rëndë të sëmundjes. Njerëzit mund të pyesin se pse duhet t’i vaksinojnë fëmijët, kur ata e kalojnë më lehtë Covidin. Por, në SHBA, 1 në 4 fëmijë që kanë vdekur nga koronavirusi, nuk ka pasur sëmundje bashkëshoqëruese”, tha Muzina.
“Sigurisht që ka skepticizëm, në Shqipëri ka edhe prindër që janë të pavaksinuar dhe është çështje delikate. Ka pasur edhe mes fëmijëve raste të miokarditit, por kjo nuk është arsye që të në pengojë”, shtoi mjekja që punon në Teksas.
Sipas Muzinës, variantet e reja që kanë dalë deri më sot dhe po vijojnë të dalin, bëjnë që mjekët të kërkojnë me ngulm vaksinimin e të gjithë popullsisë, përfshi edhe fëmijët.
