Studentët e Universitetit të Prishtinës që ushqehen në mensë kanë ngritur shqetësime për higjienën në këtë objekt.
Ata kanë treguar se kanë parë minj brenda mensës, gjë që ka shkaktuar pakënaqësi dhe shqetësim te shumë prej tyre.
Një video e dërguar nga studentët e vërteton këtë situatë, ku shihet qartë një mi afër pjesës ku merret ushqimi.
Pas raportimeve dhe ankesave të studentëve për praninë e një miu në hapësirat e mensës së Universitetit të Prishtinës, ka reaguar drejtori i këtij institucioni, Fahri Osmani.
Osmani tha për Gazetën Insajderi se ankesa është pranuar nga studentët dhe menjëherë janë ndërmarrë masa për eliminimin e brejtësit.
“Po, kemi pranuar nga ana e studentëve një ankesë rreth pranisë së një brejtësi në hapësirat e restorantit, dhe menjëherë i kemi marrë masat e duhura për eliminimin e tij. Për momentin nuk e dimë se cili ka qenë kanali i hyrjes së këtij brejtësi,” tha Osmani.
