Ministrja Arbërie Nagavci ka njoftuae se do të rishikohen tekstet nga klasa 1 deri 9.
Ajo thotë se si ministri po punojnë për ngritjen e cilësisë në arsim, shkruan Albanian Education.
Njoftimi i saj:
📚Tekstet shkollore kanë rol të rëndësishëm në mësimdhënie e mësim-nxënie, dhe shpesh janë burimet e vetme mësimore që përdorin mësimdhënësit dhe nxënësit.
Tash e disa vite, tekstet shkollore janë përcjellë me sfida dhe probleme të shumta, përfshirë aspektin përmbajtësor dhe atë teknik.
Në adresë të MASHTI-t kemi pranuar ankesa të shumta nga mësimdhënësit, nxënësit, prindërit, mediat dhe akterë të tjerë, lidhur me cilësinë e teksteve.
🟢Në linjë me këtë, kam kënaqësinë të ndaj me ju lajmin për fillimin e procesit të rishikimit të teksteve shkollore dhe materialeve mësimore.
Ky proces do të bazohet në praktikat më të mira bashkëkohore dhe do të mbështetet nga projekti KosEd i financuar nga Bashkimi Evropian.
Si Ministri po punojmë shumë për përmirësimin e cilësisë në arsim, me theks të veçantë në përmirësimin e cilësisë së teksteve shkollore për çka do të angazhojmë ekspertë që janë specialistë të fushave përkatëse.
Përmes këtij rishikimi do të sigurojmë të dhëna specifike mbi cilësinë e teksteve aktuale, të identifikojmë fushat që kërkojnë përmirësim, e të ofrojmë rekomandime për ndërhyrje të fokusuara në tekstet ekzistuese.
Rishikimi do të fillojë me tekstet e lëndëve të Gjuhës Shqipe dhe Matematikës të klasës 1 – 9, për të vazhduar me lëndët dhe fushat e tjera kurrikulare.
