Ministrja Arbërie Nagavci, thotë se në Ministri po i avancojnë politikat arsimore për t’i dhënë mundësi të barabarta secilit fëmijë.
Postimi i saj:
Kënaqësi të takoj vogëlushët në Qendrën me bazë në komunitet në Fushë Kosovë.
Shumë fëmijë zhvillojnë aktivitete edukative dhe argëtuese në klasën e edukimit parafillor e marrin mësim plotësues në këtë qendër që udhëhiqet nga organizata “The Ideas Partnership”.
I përgëzova drejtorin Arbon Osmani dhe gjithë stafin për punën dhe përkushtimin që tregojnë tash e sa vite për arsim, edukim dhe mirëqenie të fëmijëve të komuniteteve romë, ashkalinj dhe egjiptianë.
Ne, në Ministri po i avancojmë politikat arsimore për t’i dhënë mundësi të barabarta secilit fëmijë.
Kemi ndarë bursa për nxënësit e shkollave të mesme të komuniteteve dhe kemi planifikuar këtë vit edhe bursa për studentë, me fokus në Fakultetin e Edukimit.
MAShTI mbetet i hapur për bashkëpunim me organizatat si “The Ideas Partnership”, sepse të gjithë së bashku mund të bëjmë më shumë dhe të sigurohemi që secili fëmijë nesër do të jetë qytetar i vlefshëm i Kosovës.
