Arbërie Nagavci, ministre e Arsimit, Shkencës,Teknologjisë dhe Inovacionit (MASHTI), së shpejti pritet të dalë para gjykatës lidhur me akuzën se ka kryer veprën penale “Mbajtja në pronësi, kontroll ose posedim të paautorizuar të armëve”.
Nagavci po akuzohet se më 21 mars të 2018-ës, gjatë mbajtjes së seancës në Kuvendin e Kosovës në të cilën ishte hedhur gaz lotsjellës, gjatë kontrollimit nga policia asaj i ishte gjetur një sprej ngjyrë e gjelbër me pjesë spërkatëse të zezë, raporton “Betimi për Drejtësi”.
Ministrja ka deklaruar se sipas njoftimeve të media, aktakuza ka të bëjë me kundërshtimin e “Zajednicës”, çka shton se veprimi i tillë ishte i domosdoshëm.
Blerand Stavileci, zyrtar nga PDK ka reaguar pas raportimeve për ngritjen e aktakuzës ndaj Nagavcit duke thënë se është mesazhi më i keq për nxënësit që një ministre me aktakuzë të drejtoi arsimin në nivel vendi.
“Të gjithë pajtohemi se sot në shkollat tona problemet më të mëdha janë dhuna dhe bullizmi. Dhe, pikërisht ajo që do të duhej të ishte në krye të kauzës kundër këtyre dy dukurive të këqija, sot është protagonistja më e keqe për to. Pra, imagjinoni, MINISTRJA E ARSIMIT KA AKTAKUZË PËR MBAJTJE NË PRONËSI, KONTROLL OSE POSEDIM TË PAAUTORIZUAR TË ARMËVE. Fatkeqësisht, për nxënësit tonë, nuk mund të ketë mesazh më të keq sesa ky!”, ka shkruar ai në Facebook.
