Ministrja e Arsimit, Arbërie Nagavci, ka deklaruar aktualisht janë në proces dorëshkrimet për klasën e 5-të dhe të atyre që nuk kanë kaluar nga proceset paraprake, ndërsa është finalizuar procesi për tekstet e klasave 4 dhe 9.
Ajo thotë se kalimi i vendimmarrjes tek Aktivet profesionale për ta bërë përzgjedhjen e teksteve shkollore, përveç konkurrencës e ka shtuar edhe mobilizimin e të gjithëve, duke bërë që të kemi tekste më cilësore.
Postimi i saj:
Vitin e kaluar për herë të parë ua kemi krijuar mundësinë mësimdhënësve që të zgjedhin vet tekstin me të cilin duan të punojnë. Vënia në dispozicion e teksteve alternative ka ndikuar në cilësinë e teksteve dhe në seriozitetin e tekstshkruesve dhe shtëpive botuese.
Ky vendim ka bërë, po ashtu, që të shtohet përgjegjësia, në mënyrë të mos ketë pasaktësi shkencore, gabime përmbajtësore, gabime metodologjike e drejtshkrimore në tekste sikurse në të kaluarën. Vendimet e tilla që nxisin konkurrencën, e turbullojnë ujin e ndenjur që krijon monopoli dhe çojnë në një cilësi më të lartë.
Kalimi i vendimmarrjes tek Aktivet profesionale për ta bërë përzgjedhjen e teksteve shkollore, përveç konkurrencës e ka shtuar edhe mobilizimin e të gjithëve, duke bërë që të kemi tekste më cilësore.
Aktualisht janë në proces dorëshkrimet për klasën e 5-të dhe të atyre që nuk kanë kaluar nga proceset paraprake, ndërsa është finalizuar procesi për tekstet e klasave 4 dhe 9.
Gjatë shqyrtimit të raporteve të recensentëve për klasën e pestë dhe klasave tjera, komisionet kanë vërejtur edhe lëshime dhe menjëherë janë ndërmarrë masat e duhura. Afati i ankesave do të jetë 15 ditë, andaj inkurajoj çdo palë të pakënaqur që ta ushtrojnë këtë të drejtë.
Tekstet shkollore janë një faktor i rëndësishëm në ngritjen e cilësisë në arsim. Prandaj, që nga fillimi i mandatit jemi angazhuar që të rrisim cilësinë teksteve dhe këtë synojmë ta arrijmë me Ligjin e ri për Tekste Shkollore, drafti i të cilit ka qenë në diskutim publik dhe është në fazën e shqyrtimit të komenteve.
Qeveria është duke punuar me përkushtim në shumë drejtime, në mënyrë që fëmijëve tanë t’u ofrojmë arsim cilësor dhe të ardhme të sigurtë.
