Dita e hënë do të sjellë rinisjen e shkollave në të gjithë vendin. Prej disa javësh, Ministria e Arsimit ka publikuar një protokoll lidhur me zhvillimin e mësimit në kushte pandemie.
Ditën e sotme, ministrja Besa Shahini ka postuar një video në faqen e saj në Facebook, ku ilustrohet se si do të zbatohen masat në institucionet arsimore. “Zbatimi me përpikëri i rregullave dhe ndjekja e çdo protokolli për kujdesin shëndetësor, është mënyra më e mirë për të mbrojtur shëndetin e gjithsecilit”, ka shkruar Shahini lidhur me materialin e publikuar nga ana e saj.
Në video shihen procedurat që do ndiqen çdo ditë, si nga nxënësit, ashtu edhe nga prindërit e mësuesit. Një prej tyre është dhe plotësimi i formularit të vetëdeklarimit ditor, matja e temperaturës për çdo person që futet në ambientet e shkollës, e deri tek mjetet dezinfektuese për hapësirat përreth.
