Ministrja e Arsimit, Shkencës, Teknologjisë dhe Inovacionit, Arbërie Nagavci, dhe homologia e saj nga Shqipëria, Evis Kushi, nënshkruan programin e financimit të projekteve të përbashkëta të kërkimit shkencor në mes të Kosovës dhe Shqipërisë.
Ky program zgjeron hapësirën e bashkëpunimit mes Kosovës e Shqipërisë, duke shtuar numrin e projekteve që do të mbështeten në 16 sish dhe duke ofruar nga 20,000 euro për secilin projekt fitues.
Ministrja Nagavci vuri në dukje, po ashtu, disiplinat shkencore që janë me interes për dy vendet që nevojiten për t’u mbështetur e të cilat janë: shëndeti, shkencat humane e albanologjike, burimet natyrore, ndryshimet klimatike etj.
Tutje, ajo bëri të ditur kohën e aplikimit, që do të fillojë më 24 prill, ku do të kenë mundësi të aplikojnë me projekte të përbashkëta hulumtues dhe punonjës shkencorë nga dy anët e kufirit shqiptar, ndërkohë që përzgjedhja e projekteve do të bëhet në tetor të këtij viti kurse implentimi do të nis në janar 2024.
“Të vetëdijshëm për rëndësinë që ka nxitja dhe stimulimi i kërkimeve të përbashkëta, jam e bindur se rezultatet konkrete të kësaj nisme do t’i shohim të konkretizuara në arritje madhore mbarë kombëtare”, theksoi ministrja Nagavci.
Ndërkaq ministrja Kushi, nga ana e saj, u shpreh e kënaqur me bashkëpunimin që kanë pasur e që vazhdojnë të kenë të dy ministritë përkatëse, teksa përmendi aktivitetet të përbashkëta të arrira më parë, si fjala vjen, abetarja e përbashkët, teskti i gjuhës shqipe e i kulturës shqiptare në diasporë, enciklopedia shqiptare, e cila sapo ka nisur punën të dy akademitë tona të shkencave, etj.
“Sot jemi këtu për një tejetër nismë është fjala për marrëveshjen e bashkëpunimit dhe për të bashkëfinancuar projektet të kërkimit shkencor, të përbashkët a mes kërkuesve tanë”, deklaroi ministrja Kushi.
Ajo, në fakt, përkujtoi se puroja e parë e bashkëpunmit të këtij niveli ka nisur më 2019, ku janë financuar 10 projekte të përbashkëta, ndërkohë që tani rrisin numrin e financimit të projekteve të përbashkëta deri në 16 sish, teksa shtoi se tanimë do të jetë një mundësi shumë e mirë për t’u intensifikuar bashkëpunimi mes studiuesve tanë dhe universiteteve tona.
