Dita e parë e shkollës është një ditë e veçantë për të gjithë nxënësit e çdo shkolle. Kushdo që futet në godinën e shkollës ka plane të bukura, objektiva dhe dëshira të pafund, dhe qëllimin që këto t’i bëjë realitet.
Ditën e parë të shkollës këshillohet të harxhojmë një pjesë të mirë të orës mësimore për të prezantuar nxënësit me njëri – tjetrin: mund të mendohen forma nga më të ndryshmet, si të menduara nga ne ashtu edhe të improvizuara nga nxënësit.
Për ta bërë ditën e parë të shkollës sa më të bukur dhe efikase, mund të ndjekim këto hapa:
1.Mirëseardhje ngrohtë: Fillimisht me një përshëndetje të përzemërt do t’i bëjmë nxënësit të ndihen të mirëpritur dhe të vlerësuar duke prezantuar veten me entuziazëm dhe duke u treguar të hapur ndaj tyre.
2.Krijimi i një atmosfere pozitive: Organizimi i klasës me dekorime të thjeshta dhe mesazhe frymëzuese mund të ndikojë pozitivisht në humorin e nxënësve. Mund të përgatisim disa citate ose postera motivues.
3.Lojëra prezantuese: Për të thyer akullin dhe për të krijuar një ambient miqësor, mund të zhvillojmë lojëra të thjeshta prezantuese që ndihmojnë nxënësit të njihen me njëri-tjetrin dhe me ne.
Po sugjeroj disa lojëra prezantuese:
-Krijimi i një tabele me dëshira: Në hyrje të klasës, vendosim një tabelë bosh ku nxënësit mund të shkruajnë një dëshirë ose pritshmëri për këtë vit shkollor. U japim nxënësve disa lapustila ngjyra-ngjyra dhe i ftojmë të shkruajnë diçka që do të donin të mësonin ose përjetonin këtë vit. Kjo krijon një atmosferë pozitive dhe interaktive.
-Lojë prezantuese me pyetje: Zhvillojmë një lojë të thjeshtë me top. Hedhja e topit nga një nxënës te tjetri, duke prezantuar veten dhe duke thënë një fakt interesant për veten e tyre, do t’i ndihmojë nxënësit të njihen me njëri-tjetrin në mënyrë argëtuese.
–Kartat e ngjyrave për bashkëpunim: U japim nxënësve nga një kartë ngjyrash të ndryshme (p.sh., e kuqe, e gjelbër, e kaltër), dhe formohen grupet bazuar në këto ngjyra. Pastaj kërkojmë që secili grup të diskutojë për diçka që e gjejnë interesante për vitin shkollor. Kjo krijon ndërveprim dhe bashkëpunim të hershëm.
-Një kartolinë për veten e tyre: I ftojmë nxënësit të shkruajnë një letër të shkurtër për veten e tyre, duke përfshirë synimet që kanë dhe çfarë duan të arrijnë deri në fund të vitit shkollor. Këto letra mund t’i mbledhim dhe t’ua kthejmë në fund të vitit shkollor si reflektim për arritjet e tyre.
-Krijimi i një harte të klasës: Krijojmë një hartë të klasës, ku çdo nxënës mund të vendosë një foto të veten ose një simbol që e përfaqëson. Kjo hartë mund të qëndrojë gjatë gjithë vitit në klasë, duke simbolizuar bashkimin dhe përkatësinë e grupit.
-Ora e ideve të “çmendura”: Organizojmë një sesion ku nxënësit mund të propozojnë ide të “çmendura” për aktivitetet dhe projektet e ardhshme. Kjo i bën nxënësit të ndihen më të angazhuar dhe krijues që në fillim të vitit.
-Test i shkurtër “Si mësoni më mirë?”: Për të kuptuar më mirë se si nxënësit mësojnë më mirë (p.sh., vizualisht, përmes dëgjimit ose përmes aktiviteteve praktike), mund të përgatisim një test të shkurtër për stilin e tyre të të nxënit. Kjo do të të ndihmojë të përshtatim metodat e mësimdhënies në mënyrë më efikase.
-Foto e klasës: Në fund të ditës së parë, mund të bëjmë një foto të përbashkët me klasën për të kapur momentin dhe për të shënuar fillimin e vitit shkollor. Këtë foto mund ta përdorim për ndonjë projekt të ardhshëm ose për ta varur në klasë si kujtim i bukur.
4.Rregullat dhe pritshmëritë: Diskutojmë për rregullat e klasës dhe pritshmëritë në mënyrë miqësore. Kjo i ndihmon nxënësit të ndihen të sigurt dhe të qartë për atë që pritet prej tyre.
5.Diskutimi për qëllimet e vitit: Fillojmë me një bisedë të shkurtër për synimet e vitit shkollor dhe për rëndësinë e bashkëpunimit. Kjo i motivon nxënësit të kenë një fillim të mbarë.
6.Aktivitet për ndërtimin e ekipit: Mund të përfshijmë aktivitete që nxisin punën në grup, duke krijuar kështu një ndjenjë bashkësie dhe përkatësie mes nxënësve.
7.Pyetje dhe përgjigje: U japim nxënësve mundësinë që të bëjnë pyetje për gjithçka që i shqetëson. Kjo do t’i ndihmojë ata të ndihen më rehat dhe të hapur për komunikim.
