Prej shtatorit të vitit shkollor 2022/23 do të rikthehet vlerësimi i nxënësit në arsimin parauniversitar në dy periudha, siç ka qenë para vitit 2016.
Ministria e Arsimit, Shkencës, Teknologjisë dhe Inovacionit parasheh që me udhëzimin e ri administrativ vlerësimi të bëhet në gjysmëvjetorin e parë dhe gjysmëvjetori e dytë, duke e hequr vlerësimin që ishte i përcaktuar deri më tani me UA të vitit 2016, ku përfshihej vlerësimi para pushimit pranveror.
Naxhije Fejzullahu, mësimdhënëse në “Emin Duraku”, ka thënë se vlerësimi në tri periudha ka qenë i mundimshëm.
“Kjo do të kishte benefite shumë të mëdha edhe neve si mësimdhënës na hiqen barra e administratës, por në anën tjetër edhe për nxënësit vlerësimi në tri periudha ishte më stresues, pasi i nënshtroheshin shumë herë testimeve përmbledhëse të lëndëve, prej të cilave ne i përdorim si instrumente për t’i nxjerrë notat përfundimtare”, ka thënë ajo.
Udhëzimi i ri administrativ për vlerësimin e nxënësve ende nuk ka hyrë në fuqi. Ky udhëzim sipas MASHTI-t pritet të finalizohet në javët në vazhdim. /kohavision/
