Prej shtatorit të vitit shkollor 2022/23 do të rikthehet vlerësimi i nxënësit në arsimin parauniversitar në dy periudha, siç ka qenë para vitit 2016.
Ministria e Arsimit, Shkencës, Teknologjisë dhe Inovacionit parasheh që me udhëzimin e ri administrativ vlerësimi të bëhet në gjysmëvjetorin e parë dhe gjysmëvjetori e dytë, duke e hequr vlerësimin që ishte i përcaktuar deri më tani me UA të vitit 2016, ku përfshihej vlerësimi para pushimit pranveror.
Mësimdhënësit kanë thënë se vlerësimi në tri periudha ka qenë stresues për nxënësit, si dhe ngarkesë administrative për personelin arsimor.
“Kjo padyshim do ta lehtësojë punën, pasi puna administrative na ngarkon dhe na stërngarkon ne mësimdhënësit në vazhdimësi. Secila lëndë i ka instrumentet e veta të vlerësimit dhe kjo padyshim e ka rënduar në vazhdimësi, duke notuar për secilin instrument”, ka thënë Lumturie Spahija, mësimdhënëse në shkollën fillore të mesme të ulët “Emin Duraku”, në Prishtinë.
Udhëzimi i ri administrativ për vlerësimin e nxënësve ende nuk ka hyrë në fuqi. Ky udhëzim sipas MASHTI-t pritet të finalizohet në javët në vazhdim.
