Mësimdhënësja e shkollës fillore “Dardania” në Prishtinë, Elena Stublla, ka theksuar se mësimdhënësve po u atribuohet çdo lloj dështimi në arsim. Por sipas saj mësimdhënësit nuk kanë faj për gjendjen në arsim.
Stublla në emisionin “Konfront” të KTV-së, ka thënë se për këtë fajin kryesor e ka Fakulteti i Edukimit, për të cilin ajo ka thënë se është koka e problemit.
“Është e vërtetë që në arsim kemi lloj-lloj kategorish të mësimdhënësve, pa dashur ta ofendoj asnjë nga kolegët e mi, por nuk është faji i tyre që janë aty. Duhet të përmendet fillimisht që fajin kryesor e ka Fakulteti i Edukimit, i cili prodhon mësimdhënës në mënyrë të pakontrolluar e unë mendoj që aty duhet të filtrohet se kush duhet të hyjë e kush nuk e ka aftësinë të behët mësues”, ka theksuar Stublla.
Sipas saj kriteret e pranimit në këtë Fakultet duhet të ngritën.
Ajo ka thënë se Fakulteti i Edukimit nuk të përgatit për tregun e punës.
“Po flas për kohën sa unë kam qenë studente, studenti i Fakultetit të Edukimit dhe mësuesi i ri nuk kanë të bëjnë asgjë me njëri-tjetrin, aty mësohen gjëra që s’kanë të bëjnë asgjë me praktikë, me gjithë respektin për institucionin ku kam studiuar por mendoj që duhet të bëhet më shumë praktikë e metodologji, sesa të mësohen gjera koti që ndoshta askujt nuk i duhen, vetëm pse filani e ka dekanin shok dhe t’i jepen orë sa për të ja plotësuar normën”, është shprehur Stublla. /KOHA/
