Në realitetin arsimor të sotëm, drejtuesi i shkollës nuk është thjesht administrator, por lider me vizion, përgjegjësi dhe humanizëm. Merita Leli nga shkolla 9-vjeçare “Ramazan Jarani” sjell një reflektim frymëzues mbi rolin e drejtuesit që udhëheq me bashkëpunim, etikë dhe dashuri për arsimin.
Nga Merita Leli, shkolla 9-vjeçare “Ramazan Jarani”
Në realitetin e sotëm arsimor, drejtuesi i shkollës nuk mund të mbetet më një figurë thjesht administrative. Ai është udhëheqësi që mban gjallë frymën e shkollës, që njeh njerëzit, kupton ritmin e zhvillimeve dhe i përshtatet kohës me vizion e ndjeshmëri. Të drejtosh një institucion arsimor sot do të thotë të mbash në dorë një organizëm të gjallë, ku çdo vendim ndikon në mënyrën si fëmijët mësojnë, si mësuesit ndihen, dhe si prindërit besojnë.
Drejtuesi modern nuk e sheh shkollën vetëm si vend ku mësohet, por si një hapësirë që frymëzon. Ai ndërton vizionin dhe strategjinë e zhvillimit me kujdes, duke planifikuar me qëllim të qartë dhe duke vlerësuar me ndershmëri çdo arritje të institucionit që drejton. Çdo hap i tij është i menduar për përmirësim, për rritje cilësie, për përfshirje më të gjerë. Në një sistem që kërkon ndryshim të vazhdueshëm, drejtori është ai që e orienton anijen drejt stabilitetit, pa harruar se thelbi i çdo përmirësimi janë nxënësit.
Por, të drejtosh nuk do të thotë të komandohesh nga detyrat, por të udhëheqësh njerëz. Në zemër të punës qëndron bashkëpunimi me mësuesit, me të cilët ndan jo vetëm përgjegjësi, por edhe pasionin për mësimdhënie. Drejtuesi që frymëzon mësuesit për të kërkuar më shumë nga vetja, që i nxit të jenë krijues dhe të përditësuar, është drejtues që ndërton jo thjesht një staf, por një komunitet profesional,sepse një shkollë funksionon kur drejtimi dhe mësimdhënia ecin në të njëjtin ritëm, me qëllimin e përbashkët për të nxitur të nxënit e suksesshëm.
Në këtë proces, menaxhimi i burimeve njerëzore mbetet një nga shtyllat më të rëndësishme. Drejtori që di të përdorë me urtësi dhe transparencë çdo mundësi, që njeh potencialin e njerëzve dhe i mbështet ata, është ai që e kthen përgjegjësinë në besim. Drejtimi i shkollës kërkon vendimmarrje të drejtë, menaxhim të kujdesshëm dhe etikë të lartë profesionale. Pa integritet, asnjë organizim nuk mund të qëndrojë gjatë.
Një tjetër dimension thelbësor i rolit të drejtuesit është aftësia për të udhëhequr ndryshimin. Arsimi sot kërkon figura që nuk frikësohen nga risitë, por i mirëpresin ato me guxim. Drejtori është transformuesi që di të përshtatë ligjin, strategjinë dhe realitetin shkollor me rrethana konkrete, duke ruajtur gjithmonë humanizmin dhe ndjeshmërinë ndaj çdo nxënësi. Ai është ura që lidh traditën me inovacionin, që mban ekuilibrin mes kërkesave të politikave arsimore dhe nevojave të komunitetit të tij.
E pamundur të flitet për drejtim pa përfshirë prindërit dhe komunitetin. Shkolla nuk mund të qëndrojë e mbyllur brenda mureve të saj. Ajo jeton në bashkëpunim me njerëzit që e rrethojnë. Drejtuesi i mirë krijon ura komunikimi, organizon takime, dëgjon, ndërton partneritete dhe i kthen prindërit në aleatë të procesit edukativ. Kur komuniteti sheh te drejtori një figurë të besueshme, shkolla fiton një dimension tjetër: bëhet pjesë e jetës së qytetit, e kulturës së bashkëjetesës dhe e rritjes sociale.
Por, mbi të gjitha, drejtuesi duhet të jetë lider pedagogjik, njeriu që frymëzon, që mëson dhe mëson nga të tjerët. Ai është model i zhvillimit të vetvetes dhe i rritjes së kolegëve. Një drejtues që reflekton, që vlerëson, që pranon gabimet dhe punon për t’u përmirësuar, krijon në shkollë një kulturë pozitive, ku çdo njeri ndjehet pjesë e vlerës së përbashkët. Ky është drejtori që sheh më larg, që e njeh peshën e fjalës dhe të shembullit.
Në fund të ditës, drejtuesi i shkollës është më shumë se një titull. Ai është përfaqësuesi i etikës, i përgjegjësisë dhe i dashurisë për arsimin. Figura e tij mbart standardet e lidershipit të vërtetë: vizionin, komunikimin, drejtësinë, përkushtimin dhe humanizmin. Në çdo vendim që merr, në çdo bisedë me një mësues, prind apo nxënës, ai ndërton jo vetëm një institucion më të mirë, por një shoqëri më të ndriçuar.
Sepse drejtuesi i mirë nuk është ai që vetëm menaxhon, por ai që frymëzon për të mësuar më shumë, për të qenë më mirë dhe për të ndërtuar një të ardhme më të drejtë për çdo fëmijë.
© Portali Shkollor –
