Në shkollën “Emin Duraku” në Prishtinë u zhvilluan dje garat e brendshme të Matematikës, të cilat shënojnë fazën përgatitore për pjesëmarrjen e nxënësve në Olimpiadën Komunale të Matematikës për vitin akademik 2025/2026.
Organizimi i kësaj gare u mundësua nga Aktivi i Matematikës, i cili sipas drejtuesve të shkollës ka realizuar një punë të strukturuar dhe profesionale me qëllim që nxënësit të zhvillojnë aftësi konkurruese dhe të arrijnë rezultate konkrete.
Gjatë garës, nxënësit shfaqën njohuri të thella matematikore, mendim logjik të zhvilluar dhe motivim për të sfiduar veten në nivele më të larta të garimit. Mësimdhënësit e matematikës u vlerësuan për angazhimin e tyre të vazhdueshëm dhe për mbështetjen që u ofrojnë nxënësve në rrugën drejt sukseseve akademike.
Përfaqësues të shkollës theksuan se gara të tilla jo vetëm që rrisin cilësinë e procesit mësimor, por edhe forcojnë kulturën e suksesit dhe bashkëpunimit brenda institucionit.
“Me punë të përbashkët dhe përkushtim, rezultatet janë të pashmangshme,” u tha në njoftimin e shkollës, duke uruar suksese për të gjithë garuesit në fazën e ardhshme komunale.
Nxënësit më të suksesshëm do të përfaqësojnë shkollën “Emin Duraku” në Olimpiadën Komunale të Matematikës, e cila pritet të zhvillohet në muajt e parë të vitit 2026.
