Kryetari i SBASHK-ut Rrahman Jasharaj bashkë me koordinatorin për organizim të brendshëm Ymer Ymeri dhe Kryetarin e Kuvendit të Sindikatës së Arsimit Parauniversitar për Prishtinën Ahmet Pllana janë takuar me kryetarin e kryeqytetit të Kosovës, Përparim Rama.
Në këtë takim me Ramën, kreu i SBAShK-ut ka përmendur vendimin e MAShTI-t lidhur me tekstet shkollore.
Kryetari i SBASHK-ut Jasharaj ka përgëzuar kryetarin e Prishtinës për gjithë angazhimet në shërbim të qytetarëve dhe për bashkëpunimin e tij e të Drejtorisë së Arsimit me SBASHK-un në përpjekjet e përbashkëta në shërbim të arsimit dhe të realizimit të kërkesave të anëtarësisë.
Kryetari i SBASHK-ut ka deklaruar se “kemi pasur pritje se ky vit shkollor do të fillojë mbarë, por vendimi i gabuar i MASHTI-t lidhur me tekstet shkollore krijoi probleme të theksuara gjatë gjithë muajit shtator ngase furnizimi me tekste shkollore pa fajin e prindërve, mësimdhënësve e nxënësve ka ndodhur me një ritëm shumë të ngadalshëm”.
Koordinatori për organizim të brendshëm Ymer Ymeri i ka treguar kryetarit Rama për shumë nga aktivitetet e SBASHK-ut në shërbim të anëtarësisë dhe të ngritjes së vazhdueshme të cilësisë.
Ai pastaj ka shprehur gatishmërinë për të vazhduar me dialogun e sinqertë dhe bashkëpunimin e përbashkët në shërbim të arsimit në kryeqytet.
Kryetari i Kuvendit të Sindikatës së Arsimit Parauniversitar për Prishtinën Ahmet Pllana është shprehur se bashkëpunimi me DKA-në e Prishtinës është në nivel dhe se kështu do të vazhdohet edhe në të ardhmen sepse kur ka dialog e bashkëpunim të sinqertë, atëherë nuk mungojnë as angazhimet e përbashkëta e të suksesshme për të realizuar misionin e shenjtë për arsimimin dhe edukimin e brezave.
Kryetari i Prishtinës, Përparim Rama ka shprehur respekt për angazhimet e SBASHK-ut si zë i fuqishëm i punëtorëve arsimor dhe ka treguar për gatishmërinë e tij e të gjithë institucioneve komunale për të vazhduar me bashkëpunimin dhe angazhimet e përbashkëta në shërbim të arsimit. Ai ka përmendur edhe angazhimet që përmes mjeteve bashkëkohore të punës mësimi të bëhet më atraktiv dhe më i lehtë për nxënësit duke ndihmuar kështu edhe në ngritjen e cilësisë në arsim.
