Drejtori i shkollës fillore “Beqir Gashi” në fshatin Mleqan të komunës së Malishevës, Fazli Kryeziu, është duke e ushtruar edhe detyrën e mësimdhënësit të lëndës së historisë dhe gjeografisë nga muaji dhjetor i vitit 2023.
Përveç mungesës së mësimdhënësve, ai po ballafaqohet edhe me telashe rreth faqes në Facebook që mban emrin e shkollës që drejton.
KALLXO.com e ka intervistuar personin që e posedon këtë faqe, Fehmi Kryeziu.
Ky i fundit, mësimdhënës i gjuhës angleze në shkollën “Beqir Gashi”, një kohë ka qenë drejtor në këtë shkollë.
Ndërsa, nga Këshilli i Prindërve kanë thënë se nuk janë në dijeni që drejtori i shkollës është duke u angazhuar edhe si mësimdhënës për lëndët e përmendura.
Më 13.02.2024, në një faqe që mban emrin e shkollës “Beqir Gashi” në rrjetin social Facebook është publikuar një njoftim ku thuhet se janë bërë katër muaj që nxënësit nga klasa e gjashtë deri te klasa e nëntë nuk mbajnë orë të lëndëve gjeografi dhe histori.
Në një intervistë për KALLXO.com, Fazli Kryeziu ka treguar se ai ka qenë mësimdhënës i këtyre lëndëve para se të kalonte në detyrën e drejtorit të shkollës, në dhjetor të vitit 2023.
Ani pse kishte kaluar në pozitën e drejtorit, sipas tij, ai ka vazhduar t’i mbajë orët për këto lëndë.
“Kam qenë arsimtar i historisë, gjeografisë, por do orë jam duke i mbajtur sipas udhëzimit. Më ka thanë edhe Drejtoria e Arsimit deri të gjejnë zgjidhje për histori edhe gjeografi. Jam tu i kry dy punë, po shumica jam tu i kry të drejtorllakut, po edhe mësimin jam tu e mbajt” – ka deklaruar Kryeziu.
Jahir Kryeziu, kryetar i Këshillit të Prindërve në këtë shkollë, nuk është në dijeni se Fazli Kryeziu është duke u angazhuar edhe si mësimdhënës dhe nuk mendon se ai mund të angazhohet edhe në pozitën e drejtorit.
“Jo, nuk jam në dijeni që është duke i mbajtur lëndët. Ky e ka pasë drejtimin e vet, i ka pasë m’i dhanë landët e veta, i ka pasë adekuat për lëndët e veta, nuk e ka pasë për m’u ba drejtor” – ka theksuar Kryeziu.
Në lidhje me faqen e shkollës në Facebook, Fazli Kryeziu ka thënë se atë e menaxhon ish-drejtori i shkollës.
“Facebook-u i shkollës e ka menaxhu drejtori i mëhershëm, Fehmi Kryeziu. Unë kur e kam marrë detyrën, kam kërku me ma dorëzu Facebook-un, bile as kompjuterin s’ma ka dorëzu të shkollës, (kompjuterin) personal që është i shkollës. Ai ka thanë është i jemi. Facebook-un s’ma ka dorëzu edhe e ka postu ai vetë atë” – ka shtuar ai.
Kryeziu ka thënë se ia ka kërkuar këtë faqe ish-drejtorit të shkollës Fehmi Kryeziut, mirëpo ky i fundit i kishte thënë se i ka humbur fjalëkalimi dhe si rezultat i kësaj, ai nuk mund të merret me të për këtë çështje.
Sipas Kryeziut, Drejtoria e Arsimit në Malishevë është e njoftuar për këtë çështje të faqes së shkollës.
“Po, e kam njoftu (Drejtorinë e Arsimit)… Ata kanë thanë: merremi na me të, ti mos u merr” – ka njoftuar Kryeziu.
Izet Shala, zëdhënës në Komunën e Malishevës, në një përgjigje për KALLXO.com, e ka konfirmuar se janë në dijeni për telashet me faqen e shkollës.
“Po, kemi kërkuar që kjo faqe t’i kthehet shkollës” – është përgjigjur Shala.
Në anën tjetër, Fehmi Kryeziu e ka pranuar për KALLXO.com se ai është administrues i faqes së shkollës “Beqir Gashi”, të cilën deklaroi se e ka hapur kur ka filluar punën si drejtor i kësaj shkolle në vitin 2014.
Mirëpo, ai tha se Fazli Kryeziu nuk i kishte kërkuar që t’ia dorëzojë faqen e shkollës.
“Në fakt nuk është e vërtetë, ai (Fazli Kryeziu) e ka kërkuar email-in e shkollës, ndërsa faqen e shkollës nuk e ka kërkuar. Nuk kam besuar që mund ta menaxhojë si duhet atë faqe të shkollës” – është shprehur ai.
Sa i përket mbajtjes së orëve të mësimit, Fazli Kryeziu e ka pranuar se ka pasur orë të humbura gjatë kësaj periudhe.
Më 13.02.2024, në një faqe që mban emrin e shkollës “Beqir Gashi” në rrjetin social Facebook është publikuar një njoftim ku thuhet se janë bërë katër muaj që nxënësit nga klasa e gjashtë deri te klasa e nëntë nuk mbajnë orë të lëndëve gjeografi dhe histori. Gashi”. /kallxo.com
