Në nivel lokal, apo qendror, punësimet familjare dhe partiake vazhdojnë në Kosovë. Në mesin e pesë kandidateve për edukatore në Komunën e Fushë Kosovës, dy prej tyre kanë lidhje familjare dhe partiake me LDK-në, parti që udhëheq me këtë komunë.
Njëra prej tyre është gruaja e drejtorit të Zhvillimit Ekonomik, si dhe tjera është asamblistja e kësaj partie, shkruan Kanal10.
Punësimet familjare dhe partiake kanë lulëzuar së fundmi edhe në Komunën e Fushë Kosovës, që udhëhiqet nga LDK-ja.
Gruaja e një drejtori dhe asamblistja e partisë që qeverisë me këtë komunë, janë në mesin e pesë kandidatëve që janë pranuar në një konkurs për edukatore në shkolla, për nivelin parashkollor.
Naxhije Berjani është gruaja e drejtorit të Zhvillimit Ekonomik, Ekrem Berjani, kurse përveç saj është pranuar edhe Miranda Shabani, asambliste e LDK-së në këtë komunë.
Drejtori Berjani ka konfirmuar për Kanal10 se në mesin e të pranuarve në konkursin për edukatore është edhe gruaja e tij, por ai ka refuzuar të flasë para kamerës.
Derisa, ka mohuar të ketë ndikuar që bashkëshortja e tij të përzgjidhet në mesin e kandidatëve tjerë, duke thënë se ajo e ka merituar.
Kanal10 ka provuar të marr një përgjigje edhe nga asamblistja e LDK-së, Miranda Shabani, por ajo nuk është përgjigjur në thirrjet e televizionit dhe në pyetjet e dërguara.
Ndërkohë, drejtori i Arsimit në Fushë Kosovë, Fadil Krasniqi, pasi që ka konfirmuar se dy nga pesë kandidatet kanë lidhje familjare dhe partiake, ka thënë se përzgjedhja e tyre është bërë sipas kritereve të konkursit.
Përzgjedhjen e këtyre kandidateve e kanë kundërshtuar partitë opozitare në Fushë Kosovë.
Nga Lëvizja Vetëvendosje kanë thënë se kjo nuk është hera e parë që ndodhë në konkurset e kësaj komune.
Ndryshe, sa i përket këtij konkursi aktualisht është faza e ankesave, e cila përfundon më 14 dhjetor.
Shikoni videon nga minuta 31-të:
