Trajtimi 3-mujor me një kujdes intensiv mjekësor i një të porsalinduri nga një mitër e transplantuar ka përfunduar. Ky është lajmi i mirë që vjen nga mjekët turq, në Antalia.
Derya Sert është e para grua në botë, e cila ka bërë transplantin e mitrës një dekadë më parë në Spitalin Universitar Akdeniz, në provincën jugore të Antalias. Ajo u bë nënë më 4 qershor.
Foshnja, Ömer Özkan, i cili u pagëzua me emrin e njërit prej mjekëve, u transferua për kujdes intensiv pas lindjes. Tashmë, ai e kaloi procesin kritik tremujor dhe do të lërë spitalin pas disa ditësh, sapo të mbarojnë edhe kontrollet rutinë.
Mjeku Ömer Özkan, nga Spitali Universitar Akdeniz, tha se operacioni për transplantin e mitrës ka zgjatur për 7 orë. Sert pati lindje natyrale në fillim të qershorit. Ajo dhe Ömeri i vogël janë shëndoshë e mirë.
Mjeku tha se procesi i kujdesit intensiv shkoi normalisht, pasi foshnja fitoi peshë gradualisht, duke arritur në tre kilogramë. Ai shtoi se lindja e suksesshme e foshnjës u hap rrugën operacioneve të ngjashme në të ardhmen, veçanërisht për çiftet që nuk mund të kenë fëmijë.
