Në holl të shkollës “Elena Gjika”, u inaugurua një vepër arti e realizuar nga nxënësit e shkollës, nën drejtimin e arsimtares së artit, Arjeta Murtezi-Jakupi.
“Librat në rafte”, është murali më i ri i kësaj shkolle. Ai pasqyron kreativitetin e nxënësve, dhe është fryt i një pune të përkushtuar dhe bashkëpunimi mes artistësh të rinj.
Nxënësit e kësaj shkolle nga klasat e 8-ta dhe të 9-ta, rreth 3 muaj kanë punuar në këtë vepër.
Njoftimi i shkollës:
Inaugurimi i muralit “Librat në rafte” dhe ekspozitës së pikturave
Sot, me shumë krenari, inauguruam muralin e titulluar “Librat në rafte”, një vepër e realizuar me dashuri dhe përkushtim së bashku me nxënësit tanë. Ky mural përfaqëson fuqinë e dijes, rëndësinë e leximit dhe bashkëpunimin si një komunitet i fortë dhe i bashkuar.
Falënderojmë Komunën për mbështetjen financiare që e bëri këtë projekt realitet, duke treguar kujdesin për artin, edukimin dhe zhvillimin në shkollën tonë.
Një falënderim i veçantë për nxënëset Riga Salihaj, Vlera Pireci, Olta, Atika, Tuana, Enea, Rana, Dilara, Leonisa, Dea, Anisa dhe Efsun, nën përkujdesjen e arsimtares së artit Arjeta Jakupi të cilët kontribuan me punimet e tyre si pjesë e muralit dhe ekspozitës. Po ashtu, përgëzojmë nxënësit Riga Zhushi, Riana, Ermela, Anisa, Riona, Penda, Joni, Ostini, Zgjimi, Tara, Linor, Sihana, Eda, Ervin dhe Puhiza për pikturat e tyre të veçanta që e pasuruan këtë ngjarje artistike.
Kjo ngjarje na kujton rëndësinë e artit dhe dijes si udhërrëfyes të përjetshëm për brezat që vijnë.
