Në kuadër të aktiviteteve vetëdijësuese për mbrojtjen e mjedisit, shkolla fillore “Dituria” në lagjen Dardania në Ferizaj, në bashkëpunim me drejtorinë e shkollës, organizoi një aktivitet simbolik me moton “Lëre makinën, merr biçikletën”.
Aktiviteti u zhvillua në një ambient të gjelbëruar pranë shkollës, ku morën pjesë nxënës dhe mësimdhënës të kësaj shkolle.
Përveç një shëtitjeje relaksuese me biçikleta në natyrë, nxënësit patën mundësinë të informohen nga afër për përfitimet shëndetësore që sjell përdorimi i biçikletës, si dhe ndikimin pozitiv të saj në reduktimin e ndotjes së ajrit – një problem që buron kryesisht nga transporti urban.
Po ashtu, në oborrin e shkollës u hap një ekspozitë me punime të ndryshme artistike dhe edukative të realizuara nga vetë nxënësit, me qëllim vetëdijësimin për mbrojtjen e mjedisit jetësor.
“Ky aktivitet pati ndikim të madh te nxënësit, jo vetëm përmes argëtimit, por edhe përmes informimit dhe ndërgjegjësimit për rëndësinë e biçikletës si mjet ekologjik,” tha mësimdhënësja e Biologjisë, Blerta Aliu, njëherësh edhe organizatore e aktivitetit.
