Shkollat e Komunës së Istogut janë përfituese të një donacioni të rëndësishëm në pajisje teknologjike, falë kontributit të Lebibe Aliaj.
Drejtori Komunal i Arsimit, Naim Behlulaj, ka bërë të ditur se katër institucione arsimore në komunë janë pajisur me gjithsej 30 tableta dhe 4 laptopë, me qëllim të avancimit të procesit mësimor dhe përmirësimit të kushteve për nxënësit dhe mësimdhënësit.
Sipas njoftimit, përfituese të këtij donacioni janë shkollat “Bajram Curri”, “Martin Camaj”, “Tre Dëshmorët” dhe “Hysni Zajmi”.
Pajisjet e reja teknologjike pritet të shërbejnë në mbështetje të aktiviteteve mësimore, zhvillimit të kompetencave digjitale dhe krijimit të mundësive më të mira për përdorimin e teknologjisë në arsim.
Autoritetet lokale kanë shprehur mirënjohje për këtë kontribut, duke e vlerësuar si një mbështetje të çmuar për shkollat dhe përpjekjet e tyre drejt modernizimit të procesit edukativo-arsimor.
