Ka nisur sot mësimi i gjuhës shqipe në Antwerpen të Belgjikës. Kështu ka njoftuar përmes një postimi në Facebook, Ismet Ademi, kryetar i Shoqatës ‘Iliriada’, shkruan AlbanianEducation.net.
Ai ju ka bërë thirrje të gjithë bashkëmoshatarëve të këtyre nxënësve që t’iu bashkohen në këtë nismë për mësimin e gjuhës amtare.
Mësimi mbahet çdo të diel, ora 11:00-14:00.
Postimi i tij:
Të dashur bashkëkombas,
Sot zhvilluam me sukses ditën e parë të mësimit plotësues të gjuhës shqipe dhe jemi të lumtur që klasat ishin të mbushura plot me nxënës entuziastë.
A ka gjë më të bukur se të shohësh fëmijët tanë të bashkuar për të mësuar gjuhën e nënës, gjuhën tonë të bukur shqipe?
Kjo shkollë është një arritje e madhe që na gëzon të gjithëve. Pas një pune të gjatë përgatitore nga Departamenti i Arsimit dhe kryesia e Shoqatës “Iliriada”, gjithçka shkoi me sukses.
Ishte emocionuese të shihnim buzëqeshjet në sytë e fëmijëve dhe dëshirën e tyre të madhe për të folur, lexuar dhe shkruar në shqip.
Falënderojmë të gjithë pjesëmarrësit, Departamentin e Arsimit dhe anëtarët e Shoqatës “Iliriada” për angazhimin dhe përkushtimin.
Gjithashtu, i bëjmë thirrje të gjithë bashkëmoshatarëve të këtyre nxënësve që të na bashkohen në këtë nismë për mësimin e gjuhës amtare.
Ju kujtojmë që takimet zhvillohen çdo të diel, ora 11:00-14:00, në adresën: Italialei 171, Antwerpen.
Me respekt,
Kryetari i Shoqatës
Ismet Ademi
