Drejtori i Arsimit, Avni Morina, ka njoftuar se është nënshkruar kontrata me titull” Furnizimi me materiale mësimore digjitale dhe audio- vizuale për SHFMU-të e Komunës së Rahovecit”, shkruan AlbanianEducation.net.
Postimi i tij i plotë:
Lajm i mirë për nxënësit dhe mësimdhënësit e SHFMU-ve të Komunës së Rahovecit.
Të nderuar mësimdhënës dhe nxënës të Shkollave Fillore të Mesme të Ulëta (SHFMU) të komunës sonë.
Kam kënaqësinë t’ju njoftoj se më 17.12.2024, është nënshkruar kontrata me titull” Furnizimi me materiale mësimore digjitale dhe audio- vizuale për SHFMU-të e Komunës së Rahovecit”.
Në vitin e ri 2025, nxënësit dhe mësimdhënësit e SHFMU-ve të komunës sonë, do t’i keni në dispozicion materialet e tyre mësimore në trajtë digjitale dhe audio-vizuale të shumicës së lëndëve mësimore. Të gjitha materialet mësimore do të jenë në përputhje të plotë me tërësinë e planprogrameve mësimore, përkatësisht me Kurrikulën e Kosovës.
Këto materiale të vlefshme edukative dhe mësimore, nxënësit tanë, me një qasje të thjeshtë(log in), do ta kenë mundësinë t’i shfletojnë nga kompjuteri i tyre personal, nga laptopi, nga tableti, apo edhe nga telefoni i tyre, në çdo kohë, para dhe pas mësimit të rregullt në shkollat e tyre.
Ky shërbim për nxënësit dhe mësimdhënësit tanë do t’ju ofrohet falas nga komuna jonë, përmes fillimit të zbatimit të kësaj kontrate.
Urime të gjithëve!
