Rrahman Jasharaj – kryesindikalisti i SBAShK-ut – është kryepersonazhi i episodit të IV të Podcast/Përleshje. I mirë, apo i keq shembulli dhe roli i tij në sistemin arsimor të Kosovës?
Jetlir Buja e konsideron absurde fajësinë që i vihet sindikalistëve dhe punëtorëve të arsimit në lidhje me cilësinë e arsimit në vend.
Ai konsideron se kërkesat e SBAShK-ut janë legjitime, dhe se Jasharaj ka ofruar një shembull të mirë mbi mënyrën se si mbrohen të drejtat e punëtorit.
I ashpër në kundërshtim të këtij qëndrimi ishte Vullnet Krasniqi, që u shpreh se Rrahman Jasharaj duhej të kishte një plan për rritjen e cilësisë në arsim dhe se “nuk ishte ankuar për asgjë përveç pagave”.
Përleshja vijoi edhe në rritjen ose jo të cilësisë në arsim përmes rritjes së pagave. Buja u shpreh se mësimdhënja ishte profesion konkurues me profesione tjera në tregun e punës, dhe nëse pagat ishin të vogla atëherë do të tërhiqeshin njerëz më të pakualifikuar, me të kualifikuarit që do të zgjidhnin profesione më të paguara.
Krasniqi në anën tjetër, nënkuptoi se Jasharaj po e udhëhiqte SBAShK-un me dorë të hekurt, dhe kërkoi një kryetar më të ri “e më të gjallë”.
Se çka nënkupton të kesh një kryetar ‘më të gjallë’ se Rrahman Jasharaj është e vështirë të kuptohet.
Të dy gazetarët i bëri bashkë denoncimi i gjuhës së urrejtjes dhe linçimeve ndaj z. Jasharaj dhe sindikalistëve tjerë. Kujtojmë se Jasharaj është përballur me linçime e kërcënime nga eksponentë të Vetëvendosjes si Avni Zogiani, Sadri Ramabaja, Xhevdet Pozhari e të tjerë.
Administratorët e gazetës Nacionale në Viber kanë hapur një sondazh në të cilin kanë pyetur se “kush ka faj për gjendjen e keqe në sistemin arsimor?”
Deri tash, Rrahman Jasharaj ka marrë vetëm 7 për qind të votave. / NACIONALE.COM /
