Shefja e grupit parlamentar të Lëvizjes Vetëvendosje, Mimoza Kusari-Lila, ka thënë se me miratimin e koeficientit për pagat në sektorin publik, është rregulluar vendosja e barazisë, profesionalizmit dhe drejtësisë për të gjithë punëtorët e sektorit publik.
Kusari-Lila tha se ky proces, e rregullon kategorizimin në bazë të pozitave në tërë sistemin njëtrajtësisht.
“Ky proces, përveç se e rregullon kategorizimin në bazë të pozitave në tërë sistemin njëtrajtësisht, gjithashtu siguron kredibilitet të procesit të përcaktimit të pagave, pasi vlera e koeficientit lidhet me miratimin e buxhetit çdo vit kalendarik”, ka shkruar Kusari-Lila.
“Tani do të të angazhohemi dhe punojmë për ngritjen e standardit dhe mbikqyrjen e kushteve në sektorin privat”, është shprehur Kusari-Lila.
Kujtojmë se sot, Qeveria e Kosovës ka bërë të ditur se vlera e koeficientit për paga në sektorin publik do të jetë 105.
Por, kreu i ekzekutivit në mbledhjen e Qeverisë bëri të ditur se koeficienti për vitin tjetër do të ndryshojë në 110. Ai gjithashtu tha se sivjet në Kosovë u bë rritja më e madhe e pagave ndonjëherë në vend.
Menjëherë pas publikimit të vlerës së koeficientit, partitë opozitarë e kundërshtuan, duke e cilësuar si vlerë të pamjaftueshme përballë inflacionit.
Ndërsa, në seancën e sotme të kuvendit, tri partitë opozitare, PDK, LDK e AAK lëshuan sallën si shenjë revolte në lidhje me vlerën e koeficientit.
