Zv.ministri i Arsimit, Taulant Kelmendi është përplasur sot me ish-ministren e Arsimit, Hykmete Bajramin. Kjo nisi pasi që Kelmendi ngriti pyetje lidhur me projektin prej 5.6 milionë euro për platformën e digjitalizimit të arsimit në Kosovë, e cila, sipas tij, nuk është funksionale dhe nuk gjendet askund, shkruan AlbanianEducation.net.
Kelmendi pyeti ish-ministren Hykmete Bajrami se ku është avulluar ky projekt milionësh.
Ai thotë se platforma ishte pranuar nga Hykmete Bajrami, më 18 mars 2020, kur ajo ka marrë kredencialet për qasje në sistemin digjital të arsimit.
“Znj. Hykmete Bajrami ku është avulluar projekti 5.6 milionë euro për platformën e digjitalizimit të arsimit që nuk e kemi gjetur askund?! Me 18 mars 2020 (shih dokumentin) janë pranuar kredencialet për qasje në platformën digjitale të arsimit nga Hykmete Bajrami, ministre e Arsimit. Kjo platformë i kishte kushtuar buxhetit të vendit 5.6 milionë euro. Sot e asaj dite paratë kanë shkuar dhe platforma nuk gjendet askund”, ka shkruar Kelmendi në Facebook.
Kelmendi thekson se ky projekt, që duhet të paguhet nga buxheti i shtetit deri në vitin 2032, është një kosto e madhe për taksapaguesit kosovarë.
“Ne, me taksat e qytetarëve, duhet të paguajmë për këtë sistem shumën prej 5.6 milionë euro deri në vitin 2032. Platforma nuk gjindet,” ka shkruar Kelmendi.
Në përfundim, Kelmendi kërkon nga Hykmete Bajrami të sqarojë arsyet për mungesën e kësaj platforme, duke pyetur: “Hykmete ku është paswordi?”.
Nuk ka vonuar dhe ka reaguar deputetja e LDK-së, Hykmete Bajrami, ish-ministre e Arsimit, e cila ka bërë postime, ku ka adersuar edhe akuza ndaj zv.ministrit Taulant Kelmendi, duke e quajt zhvatës të kahmotshëm të parasë publike.
Postimi i parë:
“Pyeteni Jusuf Thaçin për këtë projekt të vitit 2014-2017. Pyeteni Arben Vitinë si e ka ditë ai për këtë projekt dhe lidhjen e tij me Bekim Kasumin, që e ka implementu këtë projekt. Unë në MASHT kam qënë ministre 4 muaj dhe e kam ndalu fazën e dytë të këtij projekti”, ka shkruar ajo teksa ka sqaruar se projektin në fjalë sa ka qenë ministre e ka ndaluar fazën e dytë të këtij projekti (platforme online).
Postimi i dytë i Bajramit:
Pas këtyre dy postimeve, ka reaguar sërish zv.ministri Kelmendi, i cili i ka thënë Bajramit se me 18 mars 2020, ka pranuar paswordin e platformës, ndërkaq sipas tij në Komision ka gënjyer dhe vazhdoni ta bëjë të njëjtën.
“Znj. Hykmete Bajrami unë nuk manipuloj! Me dokumente po shpalosi gënjeshtrat e tua. Troç dhe shqip, në dokumentin kur ti ishe ministre, pra me 18 mars 2020, keni pranuar paswordin e platformës, ndërkaq në Komision keni gënjyer dhe vazhdoni të gënjeni”, ka shkruar Kelmendi.
