Një nismë e ndërmarrë nga Komuna e Deçanit për të parandaluar ngacmimet seksuale në shkolla po kundërshtohet nga mësimdhënësit.
Ata janë kundër vendosjes së kamerave nëpër klasa. Kundër jetësimit të nismës është deklaruar edhe komisionerja për informim dhe privatësi. Por, në autoritetet komunale theksuan se nuk shohin masë tjetër për parandalim dhe për sigurinë e nxënësve përpos vendosjes së kamerave.
Komuna e Deçanin synon ta bëjë parandalimin dhe mbrojtjen nga ngacmimet seksuale në shkolla përmes vendosjes së kamerave vëzhguese brenda klasave.
Por, këtë po e kundërshtojnë disa mësimdhënës.
Komisionerja për Informim dhe Privatësi, Krenare Sogojeva, thotë se vendosja e kamerave brenda në klasa nuk është e lejuar.
“Kamerat janë të lejuara vetëm në korridore dhe në hapësirat jashtë brenda perimetrit ku shtrihet edhe dendësia e vetë shkollës. Vëzhgimi i kamerave bëhet me vendim të caktuar, me vendim nga ana e drejtorit të shkollës dhe ajo duhet të përdoret vetëm për qëllimet e sigurisë së objekteve dhe sigurisë së nxënësve dhe vetë mësimdhënësve”, ka thënë Sogojeva për KTV. /KOHA/
