Shkolla e Mesme Teknike “Nexhmedin Nixha” në Gjakovë ka filluar nga ky muaj të ndalojë telefonat mobil për nxënësit gjatë procesit mësimor, shkruan AlbanianEducation.net.
Drejtoria e Arsimit në Gjakovë e ka mirëpritur një organizim të tillë dhe ka thënë se ky shembull duhet ndjekur edhe nga shkollat tjera.
Megjithatë një shkollë po në Gjakovë ka tre vite që aplikon marrjen e telefonave të nxënësve para se të fillojë mësimi.
Koordinatori për sigurim të cilësisë, Arben Sufaj, në shkollën”Kadri Kusari” në Gjakovë, ka thënë se në shkollën e tyre prej tetorit të vitit 2021 kanë filluar të marrin telefonat e nxënësve para se të fillojë mësimi.
“Në shkollën e mesme profesionale “Kadri Kusari” në Gjakovë kemi filluar që të aplikojmë marrjen e telefonave gjatë procesit mesimorë që nga tetori i viti 2021. Nxënësit në fillim të orës së parë të mësimit i dorëzojnë telefonata në kuti, ndërsa orën e fundit të mësimit i marrin. Telefonat vendosen më nje kuti të mbyllur dhe qëndrojnë në Sallën e mësimdhënësve”, ka thënë Sufaj për AlbanianEducation.net.
Ai ka treguar se në fillim ky proces i ka pas sfidat e veta, pasi ka pasur nxënës që kanë hezituar ta dorëzojnë telefonin, mirëpo në takimet me prindër, Këshillin e Nxënësve, ju është sqaruar qëllimi i aplikim të kësaj metode.
“E që qëllimi ynë si shkolla ka qenë dhe është që nxënësit gjatë orës mësimore të koncentrohet ( ta kenë vëmendjen te ora e mësimit) në mësim e jo të mbajn mendjen tek telefoni se kush po e thërret apo kush po i dërgon sms. Procesi edhe këtë vit është duke vazhduar, pasi ka edhe shkolla të tjera në komune e Gjakovës por edhe më gjerë që çdo vit janë duke e aplikuar marrjen e telefonave gjatë mësimit pasi ka treguar efekte pozitive ne mësim. Për ketë veprim jemi bazuar edhe në UA 20/ 2018 te nxjerrur nga MASHT”, ka thënë Sufaj. /AlbanianEducation.net/.
