Edhe sivjet disa komuna po ju kërkojnë prindërve kontratën e punësimit, për pranim në institucione parashkollore.
Pavarësisht se Avokati i Popullit ka konstatuar se kërkesa për kontratën e punësimit të prindërve, e vendosur nga disa komuna gjatë publikimit të konkurseve për pranim në institucione parashkollore si dhe vërejtja e tyre se aplikimet pa këto dokumente nuk do të shqyrtohen është në kundërshtim me Udhëzimin Administrativ Nr.19/2016, komunat edhe sivjet po kërkojnë një dokument të tillë.
Një prind nga Malisheva ka konfirmuar për Albanian Kids Education se për t’ia regjistruar fëmijën në çerdhe ja kanë kërkuar kontratën e punës.
“Po unë fëmijën tim do ta çoj në çerdhe pasi dy prindërit punojmë dhe nuk ka kush kujdeset. Për ta regjistruar fëmijën ne cerdhe, në konkurs na është kërkuar që edhe kontrata e punës”, ka thënë ky prind që ka dashur të jetë anonim.
Një prind tjetër poashtu në kushte anonimiteti thotë se për ta regjistruar fëmijën në çerdhe i kanë kërkuar kontratën, çka e vlerëson të padrejtë.
“Po na kërkojnë edhe kontratën e punës, por ne punojmë te privat e nganjëherë edhe me vëshitrësi na i japin, veç për ndonjë kredi”, ka deklaruar ky prind.
Avokati i Popullit konstaton se kërkesa që prindërit të paraqesin kontratat e punës për regjistrimin e fëmijëve në institucionet parashkollore është diskriminuese dhe trajtim i pabarabartë para ligjit.
