Në dhjetorin e vitit 2022, Ministria e Arsimit mori vendim për shkëputjen e kontratës kolektive të nënshkruar mes Ministrisë dhe SBAShK-ut e cila mësimdhënësve u mundësonte mbulimin e shpenzimeve të udhëtimit, kompensimin e shujtës ushqimore, shpërblimin jubilar dhe përfitime të tjera për punëtorët e arsimit.
Sipas njoftimit aso kohe thuhej që kontrata shkëputet njëanshëm për shkak të mungesës së bazës ligjore, shpërputhjes me dispozitat e rendit publik dhe mungesës së legjitimitetit të palës nënshkruese.
Në këtë vendim të Ministrisë së Arsimit, nënvizohet rrëzimi i Qeverisë Hoti dhe rjedhimisht mungesa e legjitimitetit të qeverisë për të qenë palë në procedurë apo të nënshkruajë Kontratën Kolektive më SBAShK-un.
Paragrafi i parë i këtij vendimi, sipas njoftimit të MASHT-it, e bën të qartë mungesën e kompetencës në marrjen e vendimeve në rast të mocionit të mosbesimit dhe atij të shkaktuar nga mungesa e votave të duhura për votimin e Qeverisë nga Kuvendi i Republikës së Kosovës.
Kontrata Kolektive, thuhet tutje në këtë njoftim, është nënshkruar me datën 21 janar apo 30 ditë pas shpalljes së njoftimit nga Gjykata Kushtetuese lidhur me rastin KO95/20 dhe 26 ditë para mbajtjes së zgjedhjeve parlamentare në Republikën e Kosovës.
Për më tepër, thuhet në këtë dokument të lëshuar nga Ministria e Arsimit, Kontrata Kolektive nuk është buxhetuar asnjëherë, nuk është nënshkruar nga ana e Ministrisë së Financave, përderisa e njëjta parasheh obligime në emër të Ministrisë së Financave e cila nuk është palë nënshkruese.
