Ministrja Arbërie Nagavci ka njoftuar se është publikuar sot lista e përfituesve të skemës “Mësimdhënia e bazuar në punë hulumtuese”, shkruan AlbanianEducation.net.
Postimi i saj:
Kemi publikuar sot listën e përfituesve të skemës “Mësimdhënia e bazuar në punë hulumtuese”.
Qëllimi kryesor i kësaj skeme është ta ndihmojë mësimdhënien e bazuar në punë hulumtuese duke financuar veprimet mësimore të bazuara në punë hulumtuese, të cilat propozohen nga mësimdhënësit e universiteteve për lëndë specifike për t’i përtërirë agjendat aktuale të mësimdhënies.
Buxheti i planifikuar për këtë skemë mbështetëse është 150 mijë euro, ku do të ofrohen 15 grante në vlerë prej 10.000 euro. Kjo skemë financohet nga buxheti i Republikës së Kosovës dhe Projekti HEI’25.
Pas kalimit nëpër një proces transparent, secili aplikim është vlerësuar nga 3 ekspertë të angazhuar nga Diaspora shqiptare në arsimin e lartë në Evropë dhe ShBA, ndërsa lista me pikët e vlerësimit nga ekspertët ka kaluar nëpër Jurinë e emëruar për këtë program te udhëhequr nga Prof. Bruno Sergi nga Universiteti i Harvardit.
Kjo listë tashmë është miratuar edhe nga Këshilli Shkencor në MASHTI.
Palët e pakënaqura kanë të drejtë ankese 15 ditë nga dita e shpalljes së këtij njoftimi.
