Kryetari i Komunës së Drenasit, Ramiz Lladrovci së bashku me nënkryetarin Arben Shala, drejtorin e Gjimnazit “Gjergj Kastrioti-Skënderbeu”, Mentor Sahiti dhe drejtor të drejtorive komunale, të premten pasdite kanë pritur në takim nxënësit e këtij gjimnazi, të cilët kanë përfaqësuar Kosovën në konferencën e parë franko-gjermane në Parlamentin Evropian.
Kryetari Lladrovci, para të pranishmeve, ka përgëzuar nxënësit duke shtuar se këta nxënës nuk kanë bërë krenar vetëm familjen, por Drenasin e përgjithësisht Kosovën. “Falë përfaqësimit tuaj dinjitoz e me shumë krenari, ju keni hapur dyert e binjakëzimit mes gjimnazit tonë dhe shkollës gjermane. Ju përgëzoj e uroj për këto të arritura dhe ju siguroj që do të keni përkrahjen e vazhdueshme të komunës ne hapat e juaj drejtë dijes. Falënderoj miqtë gjerman, veçanërisht qytetarin e nderit të komunës sonë, njëherit zëvendës presidentin e Parlamentit Evropian, Rainer Wieland dhe drejtuesen e shoqatës gjermane Education Unlimited, Kerstin Zielonsko”, ka thënë kryetari Lladrovci.
Kryetari Lladrovci u ka ndarë edhe mirënjohje nxënësve të gjimnazit “Gjergj Kastrioti-Skënderbeu” që kanë përfaqësuar Kosovën en këtë konferencë me motivacionin “Për përfaqësimin e Kosovës në konferencën e parë franko-gjermane në Parlamentin Evropian”.
