Këshilli i Prindërve të Kosovës ka ripërsëritur paralajmërimin e bërë një ditë më parë se do të bëjnë çregjistrimin masiv të nxënësve nëse nuk hapen shkollat më 3 tetor.
Ky këshill përmes një postimi në Facebook të premten ka falënderuar UNICEF-in i cili ka kërkuar që fëmijët tu kthehen bankave shkollore.
“I jemi mirënjohës organizatës UNICEF që ka kërkuar fillimin e menjëhershëm të procesit mësimor në Kosovë, duke sqaruar edhe dëmin e madh që po i bëhet të ardhmes së fëmijëve! Do të donim që reagime të tilla, në mbrojtje të së drejtës kushtetuese të fëmijëve tanë për edukim e arsimim publik, të kishim edhe nga organizata e përfaqësi të tjera ndërkombëtare që zakonisht reagojnë për çështje shumë më pak të rëndësishme. E 22-ta ditë që rreth 320 mijë fëmijë nuk mund të shkojnë në shkolla! Hapini shkollat ose çregjistrohemi!”, thuhet në postimin e këshillit.
Greva në arsim po vazhdon që nga 25 gushti. Sindikata e Bashkuar e Arsimit, Shkencës dhe Kulturës (SBASHK) ka lënë të kuptohet se këtë fundjavë mund të dalë me një vendim për vazhdimin apo ndërprerjen e grevës.
