A e dini se prishja e dhëmbëve mund të shfaqet sapo ato fillojnë të dalin?
Prishja e dhëmbëve ndikon në shëndetin e përgjithshëm dhe mirëqenien e fëmijës. Kjo pasi dhëmbët e shëndetshëm janë të rëndësishëm për: zhvillimin gjuhësor, për të shmangur kariesin në dhëmbët e përhershëm, për të ruajtur vendin e dhëmbëve të dytë, si dhe për t’u dukur bukur.
Ndaj kujdesi për dhëmbët duhet të nisë që në fëmijërinë e hershme. Në vijim të shkrimit gjeni disa këshilla për të mbajtur dhëmbë të shëndetshëm e të bukur fëmijës suaj. Së pari duhet të kontrolloni dhëmbët e fëmijës suaj.
Pastroni dhëmbët e sapodalë me një garzë të butë e të pastër të paktën një herë në ditë, sidomos përpara gjumit.
Në rastet kur i pastroni me furçë, sasia e pastës duhet të jetë sa një kokërr bizeleje.
Fëmijët e vegjël nuk mund t’i pastrojnë vetë dhëmbët deri në moshën 7 ose 8 vjeç, prandaj ju duhet t’i ndihmoni ata.
Së dyti nuk duhet të neglizhoni kontrollet tek dentist.
Vizita e parë te dentisti duhet të jetë brenda 6 muajve pas daljes së dhëmbit të parë, ose në ditëlindjen e parë të fëmijës suaj, për të marrë këshillat e nevojshme për kujdesin dhe nevojën e flourizimit të dhëmbëve. Dhëmbët e shëndetshëm duhet të jenë të gjithë në një ngjyrë.
Nëse shihni njolla në sipërfaqen e dhëmbëve, konsultohuni me dentistin.
Së treti duhet të mbroni dhëmbët e fëmijës tuaj me fluor Fluori mbron dhëmbët nga kariesi, madje mund të parandalojë kariesin fillestar.
Rreth moshës 2-vjeçare (ose më shpejtë nëse dentisti ju sugjeron) duhet të filloni të përdorni pastë dhëmbësh të fluorizuar për fëmijën tuaj. Në vendin tonë, fluori në ujin e pijshëm gjendet në sasi minimale.
Ndaj, pyesni dentistin për lloje të tjera fluorizimi që të ruani dhëmbët sa më të shëndetshëm.
Gjithashtu duhet të dini se vendosja e foshnjës për të fjetur me një shishe që përmban lëng, qumësht, ose lëngje të tjera me sheqer mund të dëmtojë dhëmbin e tij, si pasojë e sheqerit të lëngjeve që mbetet në kontakt të gjatë me dhëmbët për një periudhë të gjatë. (Pijet freskuese përmbajnë shumë sheqer).
