Organizata joqeveritare “Zëri i Romëve, Ashkalinjve dhe Egjiptianëve”, i ka dorëzuar 11 kërkesa në Drejtoritë Komunale të Arsimit duke kërkuar “Hartimin e Planit të Veprimit Komunal Kundër Braktisjes dhe Mosregjistrimit të Shkollës” në komunat si: Prishtinë, Mitrovicë, Obiliq, Rahovec, Suharekë, Ferizaj, Fushë Kosovë, Gjakovë, Podujevë, Istog dhe Klinë.
“Organizata jonë është e përkushtuar për përmirësimin e jetës së komuniteteve rom, ashkali dhe egjiptian, dhe për këtë arsye kërkojmë hartimin e një plani të veçantë për të parandaluar dhe adresuar problemin e braktisjes së shkollës, i cili vazhdon të jetë një shqetësim i madh, veçanërisht për këto komunitete. Sipas statistikave të vitit 2019 nga Agjencia e Statistikave të Kosovës dhe UNICEF, vetëm 84% e fëmijëve të këtyre komuniteteve vijojnë shkollimin fillor, ndërsa ky numër bie ndjeshëm në ciklin e mesëm të ulët dhe në shkollimin e mesëm të lartë”, thuhet në njoftim.
Kjo organizatë ka kërkuar mbështetjen e institucioneve për të siguruar qasje gjithëpërfshirëse në arsim.
“Ne kërkojmë mbështetjen e institucioneve përgjegjëse që të ndërmarrin të gjitha hapat e nevojshëm për të siguruar qasje të barabartë dhe gjithëpërfshirëse në arsim, duke garantuar një të ardhme më të mirë për të gjithë fëmijët e Kosovës. Bashkë mund t’i japim fund braktisjes së shkollës dhe të sigurojmë një arsim cilësor për të gjithë fëmijët tanë!”, thuhet në njoftim.
