Programi jashtë orarit mësimor.
Jo gjithmonë është e lehtë t’i mbash fëmijët pas orarit mësimor. Pas një dite të gjatë, lodhja ndihet dhe shpesh duket sikur energjia ka mbaruar. Por ka diçka që i bën të qëndrojnë: dashuria për artin.
Pas mësimit, në provat e korit me 50 nxënës, kjo sfidë bëhet edhe më e prekshme. Secili vjen me lodhjen e tij, me përqendrimin e shpërndarë dhe me ritmin e vet, dhe nuk është e lehtë t’i bashkosh në një drejtim të vetëm. Kërkon kohë, kërkon durim dhe mbi të gjitha kërkon besim — si nga ana ime, ashtu edhe nga ana e tyre.
Ka ditë që nuk janë të lehta. Ka momente kur duhet të ndalosh, të rifillosh, të gjesh mënyrën për t’i motivuar sërish. Por pikërisht në këto momente kupton se sa shumë vlerë ka kjo punë. Sepse ata nuk qëndrojnë nga detyrimi, por sepse duan të jenë aty.
Përgatitja për konkursin me shkollat e Tiranës, në bashkëpunim me Teatrin e Operës, është një përgjegjësi dhe një motivim më shumë. Dy pjesë korale për secilën shkollë dhe një finale në 30 maj — por përtej kësaj, është rrugëtimi që po ndërtojmë bashkë.
Edukimin pas shkolle e gjej çdo ditë në këtë përvojë: edukimi i vërtetë vazhdon përtej klasës. Ai ndodh në këto orë shtesë, ku fëmijët mësojnë të japin më shumë nga vetja, të mos dorëzohen dhe të rriten si artistë të vegjël.
Autorja është mësuese muzike, drejtuese kori
