Shkruan: Dr.sc. Muharrem Qafleshi
Në mesin e mësimdhënësve që po japin një kontribut të çmuar në ngritjen e cilësisë së arsimit në Komunën e Dragashit, emri i Jasin Abdylit zë një vend të veçantë. Me përkushtim, profesionalizëm dhe dashuri për profesionin, ai është shndërruar në një model të mësimdhënësit që edukon jo vetëm me dije, por edhe me shembullin e tij.
Jasin Abdyli është me prejardhje nga fshati Kuk i trevës së Opojës. Studimet universitare i përfundoi në Fakultetin e Fizikës dhe Kimisë në Universitetin “Ukshin Hoti” në Prizren, ndërsa studimet e nivelit master i kreu në Fakultetin e Edukimit, Departamenti i Fizikës, në Universitetin e Prishtinës.
Rrugëtimin e tij profesional e nisi në fshatin Restelicë, vendbanimi më i madh i Komunës së Dragashit. Më pas vazhdoi punën në ShFMU “Samidin Emini” në fshatin Kuk, ku vazhdon të japë një kontribut të rëndësishëm në edukimin dhe arsimimin e gjeneratave të reja.
Puna e tij e palodhshme ka dhënë rezultate konkrete.
Nën udhëheqjen e tij, nxënësit kanë arritur suksese të jashtëzakonshme në garat komunale të Fizikës, duke fituar vendin e parë në konkursin “Fizikanti i Ri” për tri vite radhazi – në vitet 2024, 2025 dhe 2026. Këto rezultate janë dëshmi e qartë e përgatitjes profesionale, metodave bashkëkohore të mësimdhënies dhe angazhimit të vazhdueshëm të tij.
Kolegët, nxënësit dhe prindërit e njohin Jasin Abdylin si një mësimdhënës të urtë, të drejtë dhe të përkushtuar.
Ai shquhet për korrektësinë në vlerësimin e nxënësve, disiplinën në punë dhe respektimin me përpikëri të orarit mësimor.
Për të, mësimdhënia nuk është vetëm profesion, por një mision për të formuar qytetarë të ditur, të edukuar dhe të përgjegjshëm.
Në një kohë kur arsimi përballet me sfida të shumta, figura e Jasin Abdylit dëshmon se përkushtimi, profesionalizmi dhe dashuria për nxënësit vazhdojnë të jenë themeli i suksesit.
Ai mbetet një nga shembujt më të mirë të mësimdhënësit që, me punën e tij të përditshme, kontribuon në ndërtimin e një shoqërie më të arsimuar dhe me perspektivë.
