Kryetari i SBASHK-ut Rrahman Jasharaj ka thënë se nuk është e drejtë që punëtorëve të administratës iu ka dalë paga e atyre të arsimit jo, pavarësisht se sipas tij të gjithë ishin në grevë.
“Ne jemi në hall të madh. Çështja që duhet shtruar është se kur grevën e shpalli BSPK-ja, u futën punëtorët e administratave të komunave dhe nivelit qendrorë të ministrive dhe ata të SBASHK-ut. Ndodhi që shërbyesve civil iu dolën pagat ndërsa kjo nuk po ndodh me arsimin. Nëse ka ndonjë ligj për këtë çështje, ai është dashur të jetë i njëjtë për të gjithë. Është dashur të ndëshkohen të gjithë nëse ka qenë nevoja e jo vetëm punëtorët e arsimit. Nuk është e drejtë të bëhen selektime në këtë mënyrë”, deklaroi Jasharaj në një lidhje telefonike në RTV Dukagjini.
Jasharaj ka thënë se në fillim duhet të ekzekutohen pagat e pastaj të ulen palët dhe të shohin nëse ka mundësi për zëvendësimin e orëve.
Ministria e Arsimit së pari duhet të shohë pse punëtorët që ajo përfaqëson që nga çerdhet deri në universitet po ndëshkohen dhe nuk po marrin pagat, e më pas të ulemi të bisedojmë [për orët e humbura]”.
Ai ka thënë se Kontrata Kolektive nuk e parashikon që të kompensohen orët mësimore të humbura në greva, por ato mund të kompensohen nëse humben për shkak të ndonjë pandemie apo shkaqe tjera natyrore.
“Mirëpo nëse palët merren vesh për kompensimin e orëve është tjetër çështje. Por sonte nuk mund të flitet për kompensimin e orëve, pyetja është pse shërbyesit morën pagat e mësimdhënësit jo”, deklaroi tutje i pari i SBASHK-ut.
