Nga hapja e platformës E-Kosova për të aplikuar prindërit për subvencionim të mjeteve për librat, shumë prej tyre janë duke u ankuar për telashe.
Ka prej tyre që thonë se edhe pas tre ditësh përpjekje për aplikim nuk po ia arrijnë qëllimit, pasi platforma po ka probleme.
Lidhur me këtë çështje AlbanianEducation.net ka kontaktuar me ish-zv.ministrin e Arsimit, Azem Guri, i cili vendimin e Ministrisë së Arsimit e quan joligjor, e siç thotë po shkakton vështirësi edhe tek prindërit.
Ai thotë se numri i vogël i prindërve që po aplikon nuk nënkupton se të gjithë do t’i marrin paratë, pasi jo pak prindër mund të kenë probleme me kontot e tyre bankare.
“Vendimi jo ligjor i Ministrisë së Arsimit, për blerjen e tekseteve shkollore nga prindërit po shkakton shumë vështërsi.
Numri shumë i vogël i prindërve që kanë aplikuar në platëformën elektronike nuk do të thotë se të gjithë do t’i marrin mjetet, duke pas parasyesh se mund të kenë telashe me kontot e tyre. Ministria e Drejtësisë, nxori një Udhëzim Administrativ për zhbllokimin e gjirollogarive të prindërve që kanë telashe me kontot e tyre, por kjo rezultoi se është e kundërligjshme. Gjatë këtij rrugëtimi do të paraqiten edhe disa vështirësi të tjera”, ka thënë Guri për AlbanianEducation.net.
Ai thotë se fillimi i vitit të ri shkollor do t’i zë nxënësit pa libra.
“Kanë mbetur edhe tri ditë për fillimin e vitit të ri shkollor dhe ky fillim do t’i gjejë nxënësit në shkolla pa tekste dhe mjete mësimore, pra Ministria e Arsimit është në rrugë të gabuar. Zgjidhja nga kjo situatë është ofrimi i teksteve shkollore falas nga Ministria e Arsimit ashtu siç i obligon ligji”, thotë ai.
Guri kritikon tutje ministren Nagavci, ku thotë se nuk është e denjë për pozitën që ka.
“Ky është viti i dytë shkollor që ministrja Arbërie Nagavci, e fillon me telashe në arsim, duke mos respektuar ligjet e Kushtetutën, nga kjo mund të konkludojmë se nuk është e denjë të drejtojë Ministrinë e Arsimit”, ka thënë Guri. /AlbanianEducation.net/.
