Në shkollën “Tefik Çanga” në Ferizaj është zhvilluar një aktivitet i veçantë, ku nxënësit dhe stafi patën kënaqësinë të mirëpresin ish-nxënësin e kësaj shkolle, Haki Shaqirin, tashmë profesor dhe aktivist i njohur.
Vizita e tij u realizua me rastin e publikimit të revistës shkollore “Flatrat”, në të cilën Shaqiri ka dhënë një intervistë me karakter frymëzues për gjeneratat e reja.
Gjatë rrëfimit të tij, ai ndau kujtime nga periudha e shkollimit nën regjimin serb, duke theksuar vështirësitë dhe pengesat me të cilat përballeshin nxënësit shqiptarë, përfshirë presionin, dhunën dhe diskriminimin në arsim.
Megjithatë, Shaqiri nënvizoi se këto sfida u përballuan me qëndresë dhe dinjitet, duke mos e ndalur asnjëherë rrugëtimin drejt dijes.
Ai theksoi se sakrificat e brezave të mëparshëm kanë bërë të mundur realitetin e sotëm, ku nxënësit mësojnë në kushte lirie dhe me më shumë mundësi zhvillimi.
Duke iu drejtuar nxënësve, ai i inkurajoi të besojnë në vetvete dhe të punojnë me përkushtim për të përballuar sfidat e kohës moderne.
Kjo vizitë u vlerësua si një dëshmi e gjallë e forcës së dijes dhe e rrugëtimit drejt lirisë, duke lënë një mesazh të fuqishëm për rëndësinë e arsimit në ndërtimin e së ardhmes.
