Është një nga vajzat shembull se si arrihet suksesi jashtë vendlindjes. Në vitin 2006 u zhvendos për të jetuar në Kanada ku u shkollua dhe arriti të bëhet pjesë e Qeverisë së Kanadasë, ku aktualisht punon si analiste e politikave. Fjala është për Flutura Mazrekun e cila vjen nga qyteti i Rahovecit.
Ajo në një intervistë dhënë për median “Kids of Kosova” (www.kidsofkosova.net) tregon sa e ka pasur të vështirë të ndërtojë karrierë në Kanada, sa janë të përfshirë komuniteti shqiptar në jetën atje, nëse është e gatshsme të vijë në Kosovë të jape kontributin e saj, si dhe përmes një video jep një mesazh për të gjitha gratë në Kosovë që synojnë karrierë të suksesshme.
Më poshtë mund ta lexoni intervistën e plotë me znj.Flutura Mazreku dhe shikoni videon ku jep mesazhin për gratë nga Kosova:
Së pari një prezantim i juaji, një CV e shkurtër, shkollimi, puna?
Unë jam Flutura Mazreku, e lindur dhe e rritur në Rahovec, Kosove. Jetoj dhe veproj në Kanada që nga viti 2006. Jam analiste e politikave në Qeverinë e Kanadasë. Kam magjistrature në ligjin ndërkombëtarë të refugjatëve, ndërsa studimet bachelor i kam përfunduar në filozofi dhe juridik.
Jetoni dhe keni ndërtuar karrierë në Kanada. Na tregoni sa ka qenë e vështirë kjo dhe kishit ndonjë mbështetje?
Ndërtimi i karrieres sime në Kanada kishte shumë sfida, që nga zotërimi i gjuhës angleze në nivel akademik, deri te fakti që gjatë studimeve i mbaja dy punë: një si asistente në Parlametin Kanadez dhe një si Asistente Profesori në Universitet. Padyshim se pa mbështetjen e rrethit, përfshirë familjes gjithësesi, nuk do të kisha mundur t’i përballoj të gjitha këto vështirësi.
Nëse pranoi ndonjë ftesë nga ndonjë institucion në Kosovë, do të ktheheshit të jepni dijen dhe kontributin tuaj?
Patjetër, do të ishte privilegj dhe nder i madh të kontribuoja në vendim tim. Edhe pse Kanadanë e konsideroj si vendin tim, Kosova ka më shumë nevojë për talentin e shumë shqiptarëve të shtresës intelektuale dhe akademike që momentalisht gjenden anë e mbanë botës, por që Kosova nuk ju ofron mundësitë e duhura.
Cili është mesazhi juaj për vazjat dhe gratë në Kosovë që duan të ndjekin ëndrrat e tyre?
Ç’bashkëpunim keni me komunitetin shqiptarë në Kanada? Sa janë të përfshirë ata në projekte të caktuara dhe përgjithësi jetën shoqërore atje?
Unë jam goxha e lidhur me komunitetin shqiptarë në Kanada. Kam marrë pjesë në shumë organizime dhe evenimente të Ambasades së Kosovës në Kanada, pasiqë edhe punoja në Parlamentin Kandez për 6 vite.
Komuniteti shqiptarë në Kanadë është mjaft i integruar në jetën publike, kulturore dhe ekonomike duke bërë progres të jashtëzakonshëm në krijimin e imazhit pozitiv te refugjatëve të dikurshëm në qytetarë të dobishëm në shoqërinë Kanadeze. Komuniteti shqiptarë për dy dekada ka arritur suksese të jashtëzakonshme, dhe unë jam krenare te jem pjesë e këtij komuniteti. /Kids of Kosova/
