Drejtoria e shkollës “Asdreni” në Pejë ka ndarë mirënjohje për mësuesen Hatixhe Kelmendi, duke e vlerësuar për përkushtimin dhe profesionalizmin e treguar në punën e saj me nxënësit, shkruan AlbanianEducation.net.
Sipas njoftimit të shkollës, mësuesja Kelmendi është dalluar për angazhimin e vazhdueshëm në procesin edukativo-arsimor, duke u bërë shembull pozitiv për nxënësit, kolegët dhe komunitetin shkollor.
Nga drejtoria theksohet se përkushtimi, durimi dhe dashuria për profesionin kanë bërë që ajo të kontribuojë në mënyrë të veçantë në edukimin dhe formimin e brezave të rinj.
“Puna juaj e palodhur në edukimin e brezave dhe mënyra e veçantë me të cilën përcillni dijen janë vlera që meritojnë çdo vlerësim”, thuhet në njoftimin e shkollës.
Kjo mirënjohje është ndarë me rastin e 7 Marsit – Ditës së Mësuesit, me ç’rast drejtoria e shkollës i ka uruar mësueses Hatixhe Kelmendi shëndet dhe suksese të mëtejshme në rrugëtimin e saj profesional.
