Edhe një pikë shkollore në gjuhën shqipe i shtohet kantonit Thurgau, pas punës së palodhur të mësuese Valbonë Alili, si dhe përkushtimit të veprimtarëve: Nexhat Hyseni dhe Vaxhid Sejdiu.
Fakt është se aty ku veprimtarët i bashkojnë forcat për një qëllim të përbashkët sukseset nuk mungojnë, siç po ndodh në kantonin Thurgau.
Në vazhdën e përpjekjeve të hapjes së pikave shkollore në kuadër të Lidhjes së Arsimtarëve dhe Prindërve Shqiptarë “Naim Frashëri” në kantonin Thurgau, shkollave shqipe në këtë kanton i shtohet edhe pika e re shkollore në Frauenfeld, e cila këto ditë hapi dyert për nxënësit që ta mësojnë gjuhën shqipe.
Duke pasur parasysh punën dhe angazhimin e madh të veprimtarëve dhe mësuesve të shkollave shqipe: Nexhat Hyseni, Valbonë Alili dhe Vaxhid Sejdiu, pas një përkushtimi së bashku me prindërit e qytetit Frauenfeld të kantonit Thurgau në Zvicër u arrit që të hapet pika shkollore, duke ua bërë të mundshme fëmijëve shqiptarë, që ta mësojnë në mënyrë të rregullt gjuhën amtare.
Këta fëmijë të mrekullueshëm me libra në dorë dëshmojnë përpjekjet e të gjithë atyre, që sot në Zvicër janë bërë shembulli më i mirë i përkushtimit dhe angazhimit në ruajtjen e gjuhës dhe kulturës kombëtare.
Në këtë pikë shkollore punon mësuesja Valbona Alili dhe mësimi zhvillohet çdo të enjte në Shkollën “Ergaten” në Frauenfeld, nga ora 16:15 -18:00.
Lirisht mund të themi se jo vetëm nxënësit ndiheshin të lumtur: Eliza, Rea, Adriana, Domenika, Sophie, Jonart, Ejmen, Lena, Cloe, Rafaelo, Riccardo, Filipo, të cilët iu bashkëngjiten mësimeve të gjuhës shqipe, por edhe prindërit, të cilët mësimin e gjuhës shqipe e shohin shumë të nevojshme për fëmijët e tyre.
Prandaj, ju bëhet thirrje prindërve shqiptarë të qytetit Frauenfeld, që në ditët në vijim t`i regjistrojnë fëmijët e tyre në shkollën shqipe, e cila po e përgatit edhe ndarjen e fëmijëve në dy grupe, me qëllim që të shfrytëzohen të gjitha mundësitë që nxënësit ta mësojnë sa më lehtë dhe sa më mirë gjuhën shqipe. / Marrë nga prointegra.ch
