Tualetet e shkollës “Xhavit Avdyli” në Gjilan nuk janë pastruar që një javë, meqë stafi teknik që deri tash ka shërbyer, ka hyrë në grevë.
Zyhrije Matoshi së bashku me kolegët e saj nuk e kanë marrë pagën prej 250 eurosh për muajin mars, meqë kompanisë “Krasniqi”, pjesë e së cilës janë, në mars i ka skaduar kontrata që e kishte me Drejtorinë e Arsimit të Komunës së Gjilanit.
“Ne jemi në këtë shkollë. Qe nëntë vjet punojmë me kolegët tonë, edhe tash për momentin kompanisë i ka skaduar afati i kontratës më 15 mars, na kemi qenë te komuna, kryetari na ka premtuar që punën mos me ndërpre sepse do t’i paguajë komuna. Kur e kemi marr informacionin e saktë që nuk kemi paga për muajin mars, punën e kemi ndërprerë”, ka thënë Matoshi.
Pas situatës së krijuar, nxënësit i pastrojnë vetë ambientet ku qëndrojnë.
“Ne jemi obliguar nga drejtori që ta pastrojmë ambientin ku po qëndrojmë. Normalisht është e vështirë, pasi po qëndrojmë në një ambient jo të duhur për mësim”, u shpreh Erijon Mujku, nxënës në gjimnazin natyror “Xhavit Avdyli”.
Njëjtë si stafi teknik në gjimnazin “Xhavit Avdyli”, janë edhe 120 punëtorë teknikë të 28 shkollave në Gjilan që nuk kanë marrë pagë që një muaj. Edhe me protestë, pakënaqësinë e kanë shprehur të mërkurën para Komunës.
“Na grevë kemi mbajtur vetëm një ditë në shkollën tonë. Kemi punuar në mënyrë të rregullt, shkaku i kolegëve të tjerë. Këta s’kanë punuar asnjë hiç, na jemi detyruar mos t’i lejmë nxënësit në bërllok, kemi fshi, i kemi bërë punët tona, i kemi kryer, ama kjo padrejtësi që po na bëhet neve, është shumë keq pasi mbajmë familje”, pohoi Fatime Latifi, punëtore teknike në shkollën fillore “Sadullah Brestovci”.
Pronari i kompanisë “Krasniqi”, Skender Krasniqi, tha t’i ketë njoftuar zyrtarët komunalë qysh nga muaji janar se kontrata është afër përfundimit, porse paralajmërimet e tij nuk janë marr parasysh nga Komuna.
Drejtoresha e Arsimit në Gjilan Selvete Sylejmani, tha se janë në diskutime me Zyrën e Prokurimit për ta zgjidhur këtë situatë.
“I kemi disa raste individuale të cilët janë duke e bojkotuar punën si shenjë pakënaqësie, por jemi duke punuar intensivisht që kjo çështje të zgjidhet sa më shpejt që është e mundur, që shërbimi i pastrimit t’u ofrohet objekteve shkollore më kohë dhe njëkohësisht këta punëtorë teknikë t’i marrin pagat e tyre për punën e bërë”, tha Sylejmani.
Probleme të njëjta këta punëtorë kanë pasur edhe në vitin 2019, kur për tre muaj nuk ishin paguar.
/koha.net/
