Shkolla “Xhelal Hajda – Toni” në Rahovec ka prezantuar me krenari Gresa Rabën, e cila është renditur ndër tri nxënëset më të dalluara të gjeneratës, falë rezultateve të larta dhe angazhimit të vazhdueshëm gjatë gjithë viteve të shkollimit.
Sipas njoftimit të shkollës, Gresa është veçuar për përkushtimin, disiplinën dhe suksesin e vazhdueshëm në mësime. Ndër arritjet e saj më të spikatura janë vendi i parë në garën e fizikës gjatë vitit të parë të shkollimit, si dhe pjesëmarrja në garën e matematikës në vitin e dytë.
Përveç rezultateve akademike, ajo ka qenë aktive edhe në aktivitete vullnetare dhe anëtare e Klubit të Artit Figurativ, duke dëshmuar kreativitet, përgjegjësi dhe angazhim në jetën shkollore dhe komunitare.
Shkolla i ka uruar Gresa Rabës suksese të mëtejshme në studimet universitare dhe në rrugëtimin e saj profesional, duke e vlerësuar si një shembull frymëzues për gjeneratat e reja.
