Nxënësja Najeli Shyti, klasa e 9-të, shkolla “Kushtrimi i lirisë”, Durrës, ndan përshtypjet e saj mbi librin “Unë them Jo!” të Daniele Aristarco, botuar nga Albas. Ajo e përjeton librin si një udhëtim në histori, duke reflektuar mbi fuqinë e fjalës “Jo” dhe qëndresën ndaj padrejtësive.
Shkruar nga Najeli Shyti
Klasa e 9-të, shkolla “Kushtrimi i lirisë”, Durrës
Kisha kohë që nuk udhëtoja ndër vite, dekada, histori e vuajtje. Kisha kohë që heronjtë e botës i kisha harruar. “Unë them Jo!”, libri i Daniele Aristarco botuar nga “Albas” më bëri të lundroja kaq magjishëm mes ngjarjeve kryesore që në kohët shumë të largëta e deri tek unë dhe ti. Mesazhi i këtij libri është kaq i fuqishëm saqë përcillet që në titullin e tij.
Unë i them jo padrejtësive, mosbarazisë, bindjes ndaj së gabuarës e çdo gjëje të padrejtë kundrejt meje. Që unë e ti ta kemi të drejtën për të thënë jo sot, qindra vite më parë burra e gra kanë luftuar për drejtësinë e tyre dhe të pasardhësve të tyre. Që nga Spartaku, Darvini, Gandi e Martin Luter Kingu të gjithë i thanë jo të gabuarës, megjithëse i dinin pasojat që kishte kryengritja asokohe. Ndër shumë që arritën qëllimin e tyre dhe i mbijetuan shtypjes ishin Deni Didëro, Çesare Bekaria, Çarls Darvin, Gandi e të tjerë. Por jo të gjithë shpëtuan kaq lehtë. Sokrati, Hipatia, Xhordano Bruno e shumë të tjerë u vranë nga pushtetarët që nuk e pranonin këtë mosbindje. Një nga dënimet më të mëdha që u dha një faji aq shoqërisht të dënueshëm të asaj kohe, pra ndalimi konsiderohet me fat për aq sa kanë mbërritur deri në ditët tona.
“Jo”. A nuk është qesharake? Dy shkronja. Një rrokje. Një fjalë e vetme që shkaktoi kaq trazime në botën tonë të vogël. Ama secili hero e tha këtë fjalë me plot gojë dhe ne sot i admirojmë këto figura kaq trime dhe kaq të forta.
Ja pra miq! Për një lundrim në kohë dhe një sërë fjalësh jo, “Unë i them Jo!” është një must-read. Dhe ti lexues, thuaji jo gjërave që të shqetësojnë!
© Portali Shkollor
